ABŞ Dövlət Departamentinin sözçüsü Metyu Miller bildirib ki, Azərbaycan və Ermənistan son bir ildə danışıqlarda önəmli irəliləyiş əldə edib. Miller həmçinin qeyd edib ki, ABŞ-ın hər iki tərəfi sülh müqaviləsini imzalamağa təşviq edir. 
Vaşinqton-Bakı xəttindəki son gərginlikdən sonra gələn bu mesajdan nə anlamalıyıq: ABŞ hələ də bu prosesin içində aparıcı qüvvələrdəndir, yoxsa rəsmi Vaşinqton bundan sonra yoluna obyektiv vasitəçi kimi davam etmək istəyir?

Mövzu ilə bağlı Ednews-a açıqlamasında sabiq diplomat, politoloq Fikrət Sadıqov bildirdi ki, son vaxtlar Qərb ölkələri tərəfindən Azərbaycan Ermənistan münasibətlərinin normallaşmasına yox, onun daha da gərgin olmasına yönələn bir addımlar atılır: 

“Fransa parlamenti Qarabağla bağlı qətnamə qəbul edir, Ermənistanla hərbi-texniki əməkdaşlıq baş verir, digər tərəfdən ABŞ Konqresində bu məsələ müzakirə olunaraq Azərbaycanın maraqlarına zidd bəyanatlar səslənir, müəyyən qərarlar qəbul edilir. Belə bir fonda ABŞ-ın vasitəçilik etmək qabiliyyəti nə qədər realdır? Nə qədər obyektivdir? Bu məsələdə Azərbaycan çox ehtiyatlı olmalı, düşünmürəm ki, biz birmənalı şəkildə ABŞ-ın vasitəçiliyini qəbul edək. Əgər onlar hesab edirlər ki, Azərbaycan-Ermənistan arasında münasibətlər normallaşmalı və saziş ifadələrdən praktiki addımlara keçməlidirlər”. 

Politoloq hesab edir ki, prosesi Azərbaycan əngəlləmir: 

“Ermənistanda Azərbaycana qarşı müxtəlif bəyanatlar səslənir. Reallığı onlar görməlidir. Əslində ən yaxşı variant bizim Ermənistanla birbaşa görüşüb danışıqlar aparılmasıdır. Amma belə bir reallıq da gündəmə çıxır ki, bu ölkələr sanki sülh prosesində maraqlı deyillər. Hər biri hesab edir ki, onların meydançalarında proseslər getməli, danışıqlar aparılmalı, onların vasitəçiliyi ilə saziş də imzalanmalıdır. Düşünmürəm ki, biz bu yolla getməliyik. Çünki bizim Ermənistanla danışıq prosesini davam etməyimiz daha real, əlverişlidir”. 

Oğuz