Zəngəzur dəhlizi ilə bağlı məsələlər sanki gündəmdən çıxıb. Ara-sıra Türkiyə tərəfindən dəhlizin 2028-2029-cu illərdə açılmasına dair fikirlər səsləndirilir. Bəs İran üzərindən Naxçıvana əldə ediləcək çıxış fonunda Zəngəzurdan keçəcək dəhlizin arxa plana keçməsi hansı məntiqə əsaslanır?

Görəsən, Ermənistan nə zaman bu məsələnin həlli istiqamətində müsbət addımlar atacaq?

Məsələ ilə bağlı Ednews-a açıqlama verən politoloq Tural İsmayılov bildirib ki, Zəngəzur dəhlizi Azərbaycanın gündəmindən əsla çıxmayacaq bir məsələdir:

“Zəngəzur dəhlizi hazırda Azərbaycanın gündəmindən çıxmayıb. Sadəcə olaraq, nəzərə almaq lazımdır ki, Azərbaycanın Zəngəzur dəhliziylə əlaqədar ortaya qoyduğu mövqeyi dəstəkləyən ölkələr olsa da, Ermənistan bu məsələni fərqli formada təqdim etməyə və Azərbaycanla münasibətlərdə problem yaratmaq üçün Zəngəzur dəhlizi faktorunu qabartmağa və Zəngəzur dəhliziylə bağlı üzərinə götürdüyü öhdəlikləri yerinə yetirməməyə çalışır. Ona görə də Zəngəzur dəhliziylə bağlı məsələnin Azərbaycan tərəfindən arxa plana keçməsi, gündəmdən salınması əsla qəbul edilən bir məsələ deyil. 

Azərbaycan Zəngəzur dəhlizinin açılması ilə əlaqədar Ermənistanın üzərinə götürdüyü 10 noyabr Bəyanatının müddəalarını yerinə yetirməsini gözləyirdi, amma bu müddət ərzində Ermənistan müxtəlif bəhanələr gətirərək, özəlliklə regiondakı qüvvələrin də bununla bağlı çağırışlarına məhəl qoymayaraq xarici havadarlarının dəstəyi ilə prosesi ləngitməyə çalışdı”. 

Siyasi şərhçi əlavə edib ki, Zəngəzur dəhlizinin açılması Azərbaycandan çox Ermənistanın xeyrinə olardı:

“Məntiqlə baxanda Zəngəzur dəhlizinin açılması Azərbaycandan çox Ermənistanın xeyrinə olardı. Çünki 30 illik işğal dövründə iqtisadi və siyasi baxımdan dalan dövləti halına gələn Ermənistanın bu gün normal bir ölkə olaraq sivil dünyaya inteqrasiya etməsi normal kommunikasiya-logistika və nəqliyyat layihələrinin iştirak etməsinin yeganə vasitələrindən biri həm də Zəngəzur dəhlizinin işləkliyi məsələsidir. Amma ambisiyalar Ermənistandakı siyasi hakimiyyətin də müəyyən qədər bu məsələlərdə müstəqil ola bilməməsi həmçinin xarici havadların Ermənistana göstərdiyi təzyiqlər fonunda bu məsələylə bağlı Ermənistan lazım olan addımları atmadı.
Mən hesab edirəm ki, Azərbaycanın onsuz Naxçıvana quru yolla bağlı müxtəlif layihələri, İranla anlaşmalar var. Azərbaycan Zəngəzur dəhlizi məsələsini həmişə diqqətdə saxlayır”.

Mikayıl Mirzəzadə