İslam İnqilabı Keşikçiləri Korpusu (SEPAH) “Ceyş əl-Ədl” qruplaşmasının Pakistandakı bazasına ballistik raket və pilotsuz uçuş aparatları ilə zərbə endirib.Qeyd olunur ki, hücum Pakistanın İranla həmsərhəd olan Bəlucistan əyalətinə olub. Bu, İranın Pakistan ərazisinə ilk raket hücumudur. Dünən isə İraqın Ərbil şəhərinə hücumlar olub. İran hakimiyyətinin aqressiv və çoxvektorlu hücum planının əsas səbəbi nədir?

Məsələ ilə politoloq Sədrəddin Soltan Ednews-a açıqlaması zamanı bildirib ki, İran İslam İnqilabçıları Keşikçilər Qvardiyası əvvəlcə İrana daha sonra Pakistana zərbələr endirməsi regionda onsuzda gərgin olan vəziyyəti daha da ağırlaşdırır:

“Bu məsələdə Tehranın əsas hədəflərindən biri  regionda HƏMAS-İsrail münaqişəsini yaymaqdır. Çünki Suriya və İraqda Tehran qüvvələri ilə ABŞ arasında davamlı olaraq  müxtəlif istiqamətlərdə atışmalar olur. İran yönlülər ABŞ-nin bazalarına hücumlar təşkil edir, qarşı tərəfdə  İranın iki ölkədə olan mövqelərini bombardman edir. Tehran hakimiyyəti İraq və Pakistan ərazilərini bombalamaqla həm də ABŞ-a  bir ismarıc göndərir. Məsələn MOSSAD-ın  mərkəzinin vurulması məsələsi təsadüfi deyil. İraq ərazisində MOSSAD-ın qərargahı var və İrana qarşı fəaliyyətini həmən ərazidən  yerinə yetirirlər. Əslində İran bununla  İsrailə qarşı həmlə elədiyini  nümayiş etdirir. İran ilə Pakistan sərhədində bəluclar yaşayır və İran bəlucları bundan daima narazıdır. Çünki bəluclar  İranda ən çox hüquqi tapdalanan etnik qrupdur. Ona görə bu ərazilərdə etiraz aksiyaları daha çox artıb. Hətta bunlara məxsus olan  silahlı qruplaşmaların olduğuda iddia olunur. Ona görə Pakistan sərhəd əraziləri bombardman etməsinin bir digər səbəbi də burada yaşayan bəluclara hədələmək ola bilər”. 

Ekspert həmçinin qeyd edib ki, eyni zamanda İran bu ölkələrə hücum etməklə ölkələrin suverenliyini pozur: 
“İran İraqla ötən ilin yayında əldə edilən  təhlükəsizliyə dair razılaşmanı pozub. Habelə 1988-ci il İraq-İran müharibəsindən sonra tərəflər arasında imzalanan təhlükəsizlik və suverenliq müddəalarını pozub. İran hakimiyyəti İraq ərazisində onsuzda fəaliyyət göstərir. İranın İraqa qarşı əlavə olaraq  belə bir aksiya keçirməsi məntiqli deyil. İran bu addımı ilə  həm də Husiləri, HƏMAS-ı və Hizbullahı  zərbələrdən müdafiə edib. Başqa sözlə İran  bu qruplara olan təhdid və zərbərləri özünə çəkib. Digər tərəfdən  İran ilə Əfqanıstan arasında gələcəkdə problem yaşanılması istisna edilmir. Çünki Taliban rejimi ilə İran höküməti arasında bir çox problem həll olunmamış qalır”. 

Xəyal Ramiz