Yer planetində G3 səviyyəli – "güclü" təsnif olunan maqnit qasırğası qeydə alınıb. Bu barədə Rusiya Elmlər Akademiyasının Tətbiqi Geofizika İnstitutundan məlumat verilib. 

Beşballıq şkalaya əsasən G3 səviyyəsi orta güclülükdən yüksək hesab olunur. Qeyd edək ki, G1 zəif, G5 isə son dərəcə güclü maqnit qasırğasıdır. G3 səviyyəli maqnit qasırğası isə artıq enerji və rabitə sistemləri üçün ciddi təhdid yarada bilər.

Mütəxəssislərin xəbərdarlığına görə, bu cür maqnit qasırğaları zamanı elektrik ötürmə xətlərində nasazlıqlar, transformatorların həddindən artıq qızması, eləcə də avtomatik qoruyucu sistemlərin yanlış siqnallar verməsi mümkündür. Bu, iri sənaye obyektlərində və elektrik şəbəkələrində qısa müddətli kəsintilərə səbəb ola bilər.

Eyni zamanda, peyk sistemləri və GPS naviqasiyası da bu təsirdən yayınmır. Aşağı tezlikli radionaviqasiya vasitələrində fasilələr, yüksək tezlikli radio əlaqəsində pozuntular, həmçinin aviasiya sistemlərində siqnal çatışmazlıqları müşahidə oluna bilər.

Ən maraqlı təsirlərdən biri isə maqnit qasırğası zamanı orta enliklərdə – yəni adətən qütb parıltısının görünmədiyi ərazilərdə – bu nadir təbiət hadisəsinin izlənə bilməsidir. Qütb işıqları səmanın bəzi hissələrində qısa müddətli olsa da görünə bilər və bu, astronomiya həvəskarları üçün əsl fürsətdir.

Maqnit qasırğalarının insan orqanizminə də təsir etdiyi bilinir. Xüsusilə ürək-damar və sinir sistemi zəif olan insanlar bu günlərdə halsızlıq, baş ağrısı və yuxusuzluq kimi simptomlarla qarşılaşa bilərlər.

Alimlər belə hallarda elektron cihazlardan istifadəyə diqqət yetirməyi, vacib texnoloji prosesləri ehtiyatla idarə etməyi və sağlamlıq göstəricilərini nəzarətdə saxlamağı tövsiyə edirlər.

Fatimə Şükürova// EDnews