Çexiyanın “Renewable Solutions Europe” (RSE) şirkəti Azərbaycanın enerji bazarında fəaliyyətə başlamaqda maraqlıdır. Bu barədə şirkətin texniki direktoru Anton Paderna Bakı Enerji Həftəsində çıxışı zamanı məlumat verib.

EDnews xəbər verir ki, RSE şirkəti qaz və aqreqat qurğularının istehsalı üzrə ixtisaslaşıb və modul kogenerasiya həllərini müştərilərə təqdim edir. Şirkət qurğularını konteyner şəklində, tam avadanlıqlarla təchiz olunmuş şəkildə, birbaşa istifadəyə hazır formada təklif edir:

“Müştəri yalnız bir aqreqat yox, bütün avadanlıqlarla təmin olunmuş hazır texniki həll alır. Bu da əlavə tikinti işlərinə ehtiyac yaratmır – sadəcə olaraq avadanlığı quraşdırıb işə salmaq kifayətdir”, – deyə Paderna bildirib.
O qeyd edib ki, Azərbaycan qaz və neft sənayesinin inkişaf səviyyəsinə görə, bu tip qurğular üçün əlverişli bazardır:

“Bizim qurğular səmt qazı ilə də işləyə bilir. Bu isə yandırılan və ya boşaldılan qazın elektrik enerjisinə çevrilməsini mümkün edir. Beləliklə, müəssisələr öz enerji tələbatını qarşılayaraq əlavə enerji satışını da həyata keçirə bilər”.
Paderna, sərginin ilk günü olmasına baxmayaraq, Azərbaycandakı bir neçə iri podratçı şirkətlə ilkin təmaslar qurduqlarını bildirib. Hələlik konkret razılaşmalar yoxdur, lakin danışıqların davam etdiriləcəyi gözlənilir.

Şirkət təmsilçisi SOCAR-la da ilkin əlaqələrin qurulduğunu, lakin hazırda danışıqlar mərhələsinə keçilmədiyini əlavə edib:

“Biz bu sərgiyə nikbin yanaşırıq və yaxın günlərdə konkret nəticələr əldə edəcəyimizə inanırıq”, – deyə o vurğulayıb.

Fatimə Şükürova // EDnews