Türkiyə Prezidenti Rəcəb Tayyib Ərdoğan Azərbaycanda keçirilən 30-cu Bakı Enerji Həftəsinin açılışına təbrik mesajı ünvanlayıb.
EDnews xəbər verir ki, prezidentin mesajını tədbirdə iştirak edən Türkiyənin energetika və təbii sərvətlər naziri Alparslan Bayraktar səsləndirib.
Mesajda Ərdoğan Türkiyə ilə Azərbaycanın “əbədi qardaşlıq” üzərində qurulan münasibətlərinin enerji sahəsində də qətiyyətlə davam etdiyini vurğulayıb:
“Son illərdə baş verən qlobal geosiyasi proseslər enerji təhlükəsizliyi məsələsində Türkiyə-Azərbaycan əməkdaşlığının nə qədər əhəmiyyətli olduğunu bir daha göstərdi. Bakı-Tbilisi-Ceyhan, Bakı-Tbilisi-Ərzurum kəmərləri və TANAP kimi infrastruktur yatırımları bu əməkdaşlığın təkcə iki ölkə üçün deyil, bütövlükdə region və Avropa üçün də mühüm töhfələr verdiyini sübut edir”.
Prezident, mart ayında istifadəyə verilmiş İğdır-Naxçıvan qaz kəmərini də əməkdaşlığın yeni və strateji nümunəsi kimi dəyərləndirib:
“Bu xətt Naxçıvanın enerji təchizatının təhlükəsizliyini artırıb və bizi bir daha birləşdirib. Türkiyə-Azərbaycan arasında elektrik bağlantısının gücləndirilməsi də önəmli layihələrdəndir”.
Ərdoğan həmçinin elektrik enerjisi mübadiləsi məsələsində Türkiyə-Naxçıvan və Türkiyə-Gürcüstan arasında əməkdaşlıq imkanlarının artırılmasının zəruriliyini qeyd edib. O, Türkiyə, Azərbaycan, Gürcüstan və Bolqarıstan arasında imzalanmış “yaşıl elektrik enerjisinin ötürülməsi və ticarəti sahəsində əməkdaşlıq haqqında Anlaşma Memorandumu”nun əhəmiyyətini xüsusi vurğulayıb:
“Bu layihə regionun enerji təhlükəsizliyi və rifahı baxımından tarixi əhəmiyyət daşıyır”.
Ərdoğan Azərbaycanın təbii qaz ixracı sahəsindəki strateji roluna da diqqət çəkib və bu kontekstdə Türkmənistan qazının Azərbaycan və Türkiyə üzərindən nəqlinin regional rifaha və enerji marşrutlarının şaxələndirilməsinə töhfə verəcəyini bildirib.
Sonda Prezident Ərdoğan Bakı Enerji Həftəsinin iştirakçılarına uğurlar arzulayaraq tədbirin təşkilində əməyi olanlara təşəkkür edib:
“Keçən həftə Laçında bir araya gəldiyimiz qardaşım Prezident İlham Əliyevi və bütün iştirakçıları ən səmimi hisslərimlə salamlayıram”.
Fatimə Şükürova // EDnews
