"Avropa dövlətlərinin Azərbaycana artan marağı və qitə liderlərinin Bakıya intensivləşən səfərləri ölkəmizin həyata keçirdiyi balanslı və praqmatik xarici siyasət kursunun birbaşa nəticəsidir. Regionda cərəyan edən gərginlik fonunda Azərbaycan özünü etibarlı, proqnozlaşdırıla bilən tərəfdaş və qlobal marşrutların kəsişməsində mühüm qovşaq kimi təsdiqləyib".
Politoloq Azad Məmiyev bu barədə EDnews-a açıqlamasında bildirib.
Ekspertin sözlərinə görə, Azərbaycan öz xarici əlaqələrini dövlət və milli maraqlara əsaslanaraq uğurla qurur. Ölkəmiz həm şimal, həm cənub, həm şərq, həm də qərb istiqamətində qarşılıqlı faydalı münasibətlər formalaşdırmağı bacarıb.
Azad Məsiyev iqtisadi və siyasi əməkdaşlığın bir-biri ilə sıx bağlı olduğunu və bu sahələrin bir-birini tamamladığını vurğulayıb. Hazırda Azərbaycan Avropa İttifaqına üzv olan ondan artıq dövlətlə strateji tərəfdaşlıq əlaqələri qurub və onların enerji təhlükəsizliyinin təmin edilməsində mühüm rol oynayır.
Bununla belə, politoloq qeyd edib ki, Azərbaycanın Avropa üçün əhəmiyyəti yalnız neft-qaz sektoru ilə məhdudlaşmır:
“Cənub Qaz Dəhlizi, nəqliyyat marşrutları, Orta Dəhliz layihəsi, eləcə də yaşıl enerji və elektron kommunikasiya layihələri Azərbaycanın strateji mövqeyini beynəlxalq müstəvidə daha da gücləndirir. Avropa dövlət başçılarının ölkəmizə səfərlərinin intensivləşməsi də məhz bu qarşılıqlı maraqlardan irəli gəlir”.
Ekspert ölkəmizin ən böyük üstünlüklərindən biri kimi daxili ictimai-siyasi və iqtisadi sabitliyi göstərib. Cənubi Qafqazın digər ölkələrində vaxtaşırı siyasi gərginlik müşahidə olunduğu halda, Azərbaycan sabit inkişafını qoruyub saxlayır və bu da onu xarici investorlar üçün cəlbedici məkana çevirir.
Sonda Azad Məsiyev vurğulayıb ki, Avropanın enerji təhlükəsizliyi və logistikanın şaxələndirilməsi məsələlərinin aktuallığını qoruduğu bir dövrdə Azərbaycanla əməkdaşlığın əhəmiyyəti daha da artacaq. Qarşıdakı dövrdə Avropa ölkələrinin Azərbaycana səfərləri və investisiya marağı genişlənəcək, bu tərəfdaşlıq isə beynəlxalq hüquq və qarşılıqlı hörmət prinsipləri əsasında inkişaf etməyə davam edəcək.
