"Mövcud durumda Türkiyə ilə İsrailin Suriya məsələsində uzlaşmaya getmələri daha məqbuldur”.

“EDnews” xəbər verir ki, bunu Qaynarinfo-ya açıqlamasında  Azərbaycan Yəhudi Media Mərkəzinin politoloqu Rüstəm Tağızadə Suriya ətrafında Türkiyə ilə İsrail arasında gərginlişən durumu şərh edərkən deyib:

"Türkiyə ilə İsrail arasında Suriya ərazisində davam edən gərginlik dinamikası iki dövlətin prinsipləri, maraqlarının təbiətindən irəli gəlir. Məsələ ondadır ki, Əsəd devrildikdən sonra İsrail Türkiyənin Suriyada gücləndiyini gördüyündən burada Ankaranın hərbi bazasının olmasına narazılığını bildirdi. Təl-Əviv bununla bağlı Vaşinqtona da mesaj ünvanlayıb. ABŞ hazırda diqqətini İran, Yaxın Şərq və Çinə yönəltmək istəyir.

Ona görə də mövcud durumda Türkiyə ilə İsrailin Suriya məsələsində uzlaşmaları daha məqbuldur. Çünki Suriya daxilində xeyli gərgin mürəkkəb vəziyyət hökm sürür. Etnik, dini münaqişələr yenidən alovlana bilər”. 
 
 Ekspert indiki halda nə Türkiyə, nə də İsrailin aktiv münaqişədə maraqlı olmadıqlarını düşünür:

"İsrail baş naziri Netanyahunun ABŞ-a səfəri fonunda təbii ki, Türkiyə məsələsini də müzakirə ediblər. Düşünmürəm ki, indiki halda nə Türkiyə, nə də İsrail aktiv münaqişədə maraqlı olsunlar. Suriyada İsrailə lazım olan Çolan təpələri və cənub torpaqlarıdır. Türkiyə ilə İsrail anlaşaraq vahid mövqedən çıxış etsə, bunun olduqca müsbət nəticələri olacaq”. 

Siyasi şərhçi Qulamhüseyn Əlibəyli isə hesab edir ki, Ankara ilə Təl-Əviv arasında Suriya məsələsində müəyyən razılaşmalar əldə oluna bilər:

"İsraillə Türkiyə arasında münasibətlər son dövrlər daha da gərginləşib. Bu da daha çox İsrailin təcavüzkar siyasətilə bağlı olan məsələdir. İndi də bu proses Suriyaya keçib. Suriyanın yeni hakimiyyətilə Ankaranın münasibətləri yaxşıdır. İsrail də mövcud vəziyyətdə çalışır ki, Suriyadan daha çox ərazi götürsün. Faktiki olaraq buna nail olublar da. Bunlar isə Ankara ilə Təl-Əvəv arasında müəyyən gərginliklərə gətirib çıxarır”. 

Amma həmsöhbətimizin fikrincə, bu gərginlik diplomatik gərginlikdən o tərəfə keçməyəcək:

"İsrail hərbi cəhətdən Türkiyə ilə üz-üzə gəlmək imkanına malik deyil. Son nəticədə tərəflər arasında hərbi qarşıdurma olmasa da, mövcud siyasi gərginlik hələ uzun müddət davam edəcək. 

Lakin onlar arasında Suriya məsələsində hansısa bir razılaşmaların olması da mümkündür. Amma konkret hansı məsələlərdə razılaşmanın olacağını gələcək göstərəcək”.  

Qeyd edək ki, Suriya ətrafında Türkiyə ilə İsrail arasında gərginlik artan istiqamətdə davam edir. Hər iki tərəf Yaxın Şərqin bu regionunda öz mövqelərini möhkəmləndirməyə çalışır. Bu fonda da müəyyən məsələlərdə maraqları toqquşur. 

Bu günlərdə Türkiyənin XİN rəhbəri Hakan Fidan bildirib ki, İsrail regionda xarici siyasətini daha böyük məsuliyyətlə aparmalıdır, seçdiyi vektor isə yəhudi dövlətinə sabitlik gətirməyəcək.