"Ukraynada mayın sonuna qədər müharibəyə son qoyulacağına inanmıram. Timoşenko isə yəqin ki, Ukraynada hakimiyyət dəyişikliyi ola biləcəyini düşünür".

“EDnews” xəbər verir ki, bunu Qaynarinfo-ya açıqlamasında siyasi şərhçi Elçin Şıxlı Ukraynanın keçmiş baş naziri Yuliya Timoşenkonun mayın sonuna doğru Ukraynada münaqişəyə son qoyulacağı barədə fikrini şərh edərkən deyib. 

"Bunun baş verməsi ehtimalı çox aşağıdır. ABŞ prezidenti Donald Tramp hələ ki, tərəfləri atəşkəsə belə gətirə bilməyib. Döyüşlər səngimədən davam edir. İnfrastrukturlar zərbələrin dayandırılması barədə razılığa gəlsələr də, görünən odur ki, bu məsələdə də tərəflərdən heç biri razılaşmaya əməl etmir", deyə Elçin Şıxlı bildirib.
 
 Həmsöhbətimiz qeyd edir ki, Ukraynanın keçmiş baş naziri Yuliya Timoşenkonun birdən-birə nədən zühur etməsi isə görünür, onun hakimiyyət üçün darıxmasının əlamətidir:

"Ola bilsin Ukraynada hakimiyyət dəyişikliyi ola biləcəyini düşünür. Bu fonda da yenidən hakimiyyətə gəlmək niyyətindədir. May ayının sonuna doğru ən yaxşı halda cəbhədə atəşkəs ola bilər. Amma sülhün əldə edilməsi hələlik mümkünsüzdür”.

Qeyd edək ki, Ukraynanın keçmiş baş naziri Yuliya Timoşenko Qərbin bu il mayın sonuna qədər Ukraynadakı münaqişəyə son qoyacağının anonsunu verib. O, bunun beynəlxalq plan olduğunu vurğulayıb.

Xatırladaq ki, bundan əvvəl müharibənin üçüncü ildönümündə Ukrayna prezidenti Volodimir Zelenski sülhə nail olacağını bildirib. O, Rusiya ilə münaqişəyə son qoymaq üçün istefa barədə düşündüyünü də qeyd edib.