"Paşinyan mövcud vəziyyətdə Rusiya ilə arasında olan buzları əritmək istəyir".
“EDnews” xəbər verir ki, bunu Qaynarinfo-ya açıqlamasında bunu politoloq Natiq Miri Ermənistan baş naziri Nikol Paşinyanın Azərbaycanla sülh müqaviləsinin mətnilə bağlı razılaşma barədə ilk olaraq dostu Fransa prezidenti Emmanuel Makronu deyil, Rusiya prezidenti Vladimir Putini məlumatandırmasını şərh edərkən deyib.
Ekspertə görə, Paşinyanın belə qərar verməsində əsas iki istiqamət var:
"Məntiq nöqteyi-nəzərdən Rusiya Fransadan fərqli olaraq prosesin əvvəldən sona qədər daha fəal iştirakçısı olub. Unutmayaq ki, Ermənistanı Azərbaycanın əlindən alan Rusiya amilidir. 10 noyabr atəşkəs sənədinin ortalığa çıxmasının birbaşa səbəbkarı Rusiyadır. Ona qədər Ermənistan ordusunun əsas hissəsini təşkil edən Qarabağdakı silahlı qüvvələr tamamilə müasirə altında idilər və məhv olma təhlükəsilə üzləşmişdilər. Bu baxımdan, Paşinyanın sülh sazişinin mətnilə bağlı ilk öncə digər ölkə liderlərini deyil, məhz Putini məlumatlandırması təbii və məntiqlidir".
Politoloq qeyd edir ki, Paşinyanın belə qərar verməsinə mövcud geosiyasi vəziyyət də təsir göstərib:
"İkinci bir tərəfdən, hazırda qlobal və regional səviyyədə geosiyasi vəziyyət fərqli müstəvidə inkişaf edir. Rusiya Ukrayna müharibəsilə bağlı atəşkəsin əldə edilməsi ehtimalı var. Bu kontekstdə də ABŞ Rusiya yaxınlaşması var. Belə vəziyyətdə də ermənilərin havadarı Fransanın başı daha çox öz təhlükəsizliyinin təmin olunmasına qarışıb. Dolayısı ilə Paşinyan bununla Putinə "səni saydığımız üçün, sənə məlumat verməyi özümüzə borc bildik" görüntüsü yaratdı. Ancaq hər kəsə bəllidir ki, sülh sənədinin mətninin razılaşdırılmasında Kremlin heç bir rolu olmayıb".
Həmsöhbətimizin fikrincə, bu həm də tədricən Rusiya ilə münasibətləri tənzimləmək və ona yaxınlaşmaq xarakteri daşıyır:
"Çünki əvvəlki illərdə Moskvada 9 may faşizm üzərində qələbə tədbirində iştirakdan imtina edən Paşinyan bu dəfə həmin tədbirlə bağlı Moskvaya gedəcəyini təsdiqləyib. Bu faktın özü də göstərir ki, Paşinyan indiki vəziyyəti nəzərə alaraq, Rusiya ilə arasında olan buzları əritmək istəyir. Çünki növbəti parlament seçkilərinə az qalır. Odur ki, Paşinyanın çevik siyasət yürütdüyünü demək mümkündür".
Qeyd edək ki, Ermənistanın baş naziri Nikol Paşinyan Azərbaycanla sülh sazişinin mətni ilə bağlı əldə edilən razılaşma barədə ilk olaraq Rusiya prezidenti Vladimir Putini məlumatlandırıb. Halbuki son proseslər Paşinyanın Rusiyadan uzaqlaşmaq kursu götürdüyünü deməyə əsas verirdi. Bu əsasda da erməni baş nazir əsas hamisi olan Fransaya, onun prezidenti Emmanuel Makrona üz tutmuşdu. Amma birdən-birə Bakı ilə əldə olunan razılaşma barədə hesabatı Makrona deyil, ilk olaraq Putini verir.
