Xəbər verdildiyi kimi, "Global Media Group" MMC-nin tərkibinə daxil olan xəbər saytları ciddi kiberhücuma məruz qalıb. Hücum nəticəsində saytlar bir neçə gün ərzində əlçatmaz olub. Baş verən bu hadisə media qurumlarının kiber təhlükəsizlik məsələlərini gündəmə gətirib.
Maraqlıdır, kiberhücumların qarşısını almaq niyə mümkün olmayıb?
Məsələ ilə bağlı İKT üzrə ekspert Elvin Abbasov “EDnews” -a açıqlama verib. O bildirib ki, bütün dünyada, eləcə də Azərbaycanda gündə minlərlə kiberhücum baş verir. Bu hücumlar həm dövlət strukturlarına, həm bizneslərə, həm də vətəndaşlara yönəlir:
"Xüsusilə, vətəndaşlara qarşı kiber dələduzluq və kiber cinayətkarlıq hallarının artması müşahidə olunur. Bu cür hücumlar manipulyasiya edilmədən istifadəçinin telefonuna, kompüterinə və şəbəkələrinə daxil olmaqla şəxsi məlumatları əldə etmək və ya silmək məqsədilə həyata keçirilir. Keçən illərdə çox sayda biznes strukturuna, xüsusilə də hostinq şirkətlərinə kiberhücumlar baş verib. Bu hücumların nəticəsində bir çox bizneslər böyük maliyyə itkilərinə məruz qalıb. Hər il dövlət qurumlarına da müxtəlif kiberhücumlar edilir. Statistikalar göstərir ki, bu hücumların böyük əksəriyyəti uğursuz olsa da, bəzi kiçik hissələri uğurlu olur".
E.Abbasov qeyd edib ki, Azərbaycan informasiya məkanında baş verən hücumlar onların serverlərinin necə qorunduğu ilə bağlı böyük suallar yaradır:
"Bu hadisə həmin media qurumlarının və digər təşkilatların kiber təhlükəsizliklərini necə qoruduğunu, kadr ehtiyatlarının nə qədər kvalifikasiyalı olduğunu və ya həmin media holdinqin öz resurslarını eyni fiziki serverdə yoxsa ayrı-ayrı mühitlərdə saxladığını göstərib. Təbii ki, o qədər informasiya agentlikləri bir fiziki serverdə saxlanılıbsa və buna müdaxilə olubsa, bu, o deməkdir ki, oradakı bütün saytlar bir-bir ələ keçirili bilib. Əgər başqa-başqa serverlərdə məlumatlar saxlanılıbsa, bu daha çox problemdir, demək, həmin media qurumları öz kiber təhlükəsizlikləri barədə düşünməyiblər və onlar bu cəhətdən çox zəif imiş. Bu, xüsusilə onların serverlərinin necə qorunduğu ilə bağlı böyük suallar yaradır".
Ekspert vurğulayıb ki, heç bir qurum, istər dövlət, istərsə də biznes strukturu olsun, kiber təhlükəsizlik sahəsində tam müdafiəyə sahib deyil:
"Lakin dövrümüzün çağırışlarına uyğun yeni texnologiyalar və həllər mövcuddur. Bu həllər 99% təhlükəsizlik təmin edə bilir. Yeni proqram təminatları və avadanlıqlar, kiber təhlükəsizlik sahəsində böyük inkişaflar təklif edir. Ölkəmizdə də bu həllər istifadə olunur, lakin özəl qurumlara bu sahədə məcburi tələblər yoxdur. Buna baxmayaraq, xüsusilə böyük və əhəmiyyətli işlə məşğul olan holdinq, biznes qurumları öz kiber təhlükəsizliklərini qorumağa diqqət yetirməlidir".
