Maliyyə naziri Samir Şərifov Milli Məclisin İqtisadi siyasət, sənaye və sahibkarlıq komitəsinin iclasında “2023-cü il dövlət büdcəsinin icrası haqqında” qanun layihəsinin müzakirəsi zamanı bildirib ki, Azərbaycanın xarici dövlət borcunun 5 milyard ABŞ dolları artırılması düşünülür.
Azərbaycan nəyə görə xaricdən borc alır?
Məsələ ilə bağlı Ednews-a danışan iqtisadçı ekspert Eldəniz Əmirov bildirib ki, Azərbaycanın valyuta ehtiyatlarından səmərəli şəkildə istifadə edilsə aşağı borcla xarici borc almaq olar:
“İlk öncə onu qeyd edək ki, Azərbaycan xarici dövlət borcuna görə, dünya ölkələri ilə müqayisədə ən yaxşı səviyyədə olan ölkələrdən biridir. Azərbaycanın ÜDM-i 2003-cü ildə 123 milyard manat olub. Xarici dövlət bocu isə 5.5 milyard dollardır. Bunu da manata çevirsək təxmini 9.3 milyard manat edir. Göründüyü kimi, bu, ÜDM ilə nisbətdə kifayət qədər aşağı göstəricidir.
Ekspertin sözlərinə görə, Azərbaycanın valyuta ehtiyatlarının 70 milyard dollara yaxın olduğu bildirilir. Əgər bu ehtiyatlardan səmərəli şəkildə istifadə edilirsə, xarici borclanmaya daha aşağı faizlə getmək olar:
“Məsələnin daha dəqiq şərhi üçün düşünürəm ki, xarici borcun hansı faizlə alınacağı, ehtiyatlarımızın hansı qaydada idarə ediləcəyi və s kimi məsələləri nəzərdən keçirtmək lazımdır. Hər bir halda hökümət tərəfindən belə bir açıqlama verilirsə, işğaldan azad edilmiş ərazilərimizdə yenidənqurma işlərinin sürətləndirilməsi və eləcə də digər xərclərin qarşılanması məqsədi ilə bu yanaşma ortaya qoyulub.
Bir daha təkrar edirəm, bütün hallarda xarici borclanmanın hansı faizlə və hansı şərtlərdə həyata keçirilməsindən çox şey asılıdır. Bu göstəricinin davamlı tendensiya halı almaması şərti də mütləqdir.”
Fərid Axund
