Bu gün mayın 8-dir. 1992-ci il mayın 8-də Şuşa şəhərinin Ermənistan silahlı birləşmələri tərəfindən işğal olunmasından sonra bu təqvimi Azərbaycan tarixinə qara hərflərlə yazılmış bir gün kimi qeyd etdik. 28 il Şuşa həsrəti, Şuşa niskili ilə yaşadıq. İllərlə bu gözəl diyara nə əlimiz çatdı, nə ünümüz yetdi. Nə də doğma torpağına ayaq basa bildik. Əsrə bərabər bu illər ərzində Şuşa xatirələrimizdə və xəyallarımızda yaşadı. 8 may tarixini ən qiymətli sərvətimizin itən günü, qürurumuzun sınan günü kimi dərin hüzn və kədərlə andıq. 28 il mədəniyyətimizin beşiyi, qürur mənbəyimiz, şairlərin, bəstəkarların doymadan vəsf etdiyi dağlar gözəlinin həsrəti ilə yaşadıq...
Düşmən isə bu illər ərzində Azərbaycanın tarix və mədəniyyət mərkəzi hesab edilən bu gözəl şəhəri yağmaladı, taladı. Tarixinə, mədəniyyətinə, incəsənətinə, mənəvi dəyərlərinə əl uzatdı. Tarixini saxtalaşdıraraq bizdən qoparıb özününkü etməyə çalışdı. Ancaq bacarmadı. Şuşa 28 illik işğal dövründə sınmadı, əyilmədi, bizi - əsl sahiblərini gözlədi...
Bəli, biz 28 ildən sonra Şuşaya qayıtdıq, özü də qürurla, qalib xalq kimi. 2020-ci il noyabrın 8-i Müzəffər Ali Baş Komandan İlham Əliyevin rəhbərliyi ilə rəşadətli ordumuzun qəhrəmanlığı sayəsində Azərbaycan tarixinə yeni gün yazıldı. 8 may Şuşanın işğalı günü 8 Noyabr – Zəfər Günü ilə əvəzləndi. Vətən müharibəsinin 43-cü günündə Prezident, Müzəffər Ali Baş Komandan İlham Əliyev xalqa müraciətində “Böyük fəxarət və qürur hissi ilə bəyan edirəm ki, Şuşa şəhəri işğaldan azad edildi! Şuşa bizimdir! Qarabağ bizimdir!” müjdəsi hər bir azərbaycanlıya böyük sevinc və qürur bəxş etdi.
Şuşanın azadlığa qovuşması ilə şəhərə yeni ruh, yeni nəfəs gəldi. Artıq düşmənin 28 il ərzində vurduğu yaralar sağalır. Şuşa yenidən qurulub abadlaşaraq dünyanın ən gözəl şəhərinə çevrilir. Erməni vandalizminə məruz qalan tarixi-mədəni abidələr bərpa edilir, evlər tikilir, illərdir yurd həsrəti ilə yaşayan şuşalılar yenidən doğma yurda qayıdır. Şuşa yenə dünyanın hər yerindən gələn qonaqlarını qarşılayır, təmiz havası, ecazkar təbiəti ilə hər kəsi heyran edir. Şuşanın yenidən çal-çağırlı, toy-büsatlı günləri başlayıb. Yenə Cıdır düzündə "Koroğlu"nun uvertürası dağlara səs salır. Doğma qoynunda yenə də Vaqif Poeziya Günü, “Xarıbülbül” Beynəlxalq Musiqi Festivalı, 8 Noyabr - Zəfər Günü kimi bayramlar keçirilir.
Artıq xalqımız mayın 8-ni kədər, həsrət və niskillə anmır, Şuşanın işğaldan azad edildiyi və tariximizə qızıl hərflərlə yazılmış 8 Noyabrı fəxarət və qürur hissi ilə qeyd edir. Yeni dövrün mübarək, azad Şuşa!
Fatimə Mərdanlı //EDnews
