İyunun 11-də səma müşahidəçilərini unikal və nadir bir mənzərə gözləyir – ilin ən diqqətçəkən təbiət hadisələrindən biri hesab olunan "Çiyələk Ayı" səmanı işıqlandıracaq.

Yazın ilk tam ayı və yay gündönümündən əvvəlki sonuncu belə hadisə olan bu fenomen dünyanın bir çox yerindən izlənilə biləcək. "Çiyələk Ayı" adlandırılmasının səbəbi isə onun çiyələk rənginə bənzəyən isti, narıncı-qırmızı tonlara bürünməsidir. Bu, Ayın Yerin atmosferindən keçən işığa məruz qalması nəticəsində yaranan optik illüziyadır. Atmosferdəki bu təhrif onun həm daha iri, həm də daha parlaq görünməsinə səbəb olur.

"Çiyələk Ayı" xüsusilə Şimal yarımkürəsində olan müşahidəçilər üçün vizual olaraq daha təsirli olacaq. Bu il Ay üfüqdə qeyri-adi dərəcədə aşağıda göründüyü üçün o, adi günlərdəki görünüşündən təxminən 20% daha böyük təsir bağışlayacaq. Mütəxəssislər qeyd edirlər ki, bu hadisə 2043-cü ilə qədər bu qədər aşağıda və bu vizual effektlə müşahidə edilməyəcək. Beləliklə, bu hadisə ulduzları və səma mənzərələrini izləyənlər üçün unikal fürsət hesab olunur.

“Çiyələk Ayı” termini elmi deyil, əfsanəvi və mədəni köklərə malikdir. Bu ad əsasən Şimali Amerikanın yerli tayfaları tərəfindən iyun ayında çiyələk yığım mövsümünə təsadüf etdiyi üçün istifadə olunub. Lakin bu termin müasir astronomiyada da bənzər hadisələrə bədii çalar qatmaq üçün istifadə olunur.

Fotoqraflar, astronomiya həvəskarları və təbiət aşiqi olan insanlar üçün bu hadisə həm də nadir çəkiliş və müşahidə imkanı yaradır. Onu izləmək üçün ən uyğun vaxt isə gün batımından dərhal sonradır – Ay üfüq xəttindən yüksələrkən daha da möhtəşəm görünür.

Səmanı izləməyə hazır olun – təbiətin bu poetik şousu illərlə yadda qalacaq.

Fatimə Şükürova // EDnews