Kaliforniya ştatı və qubernatoru Qevin Nyusom ABŞ Prezidenti Donald Trampa, Pentaqona, həmçinin müdafiə naziri Pit Heqsetə qarşı məhkəmə iddiası qaldırıb.

EDnews-ın RBK-ya istinadla xəbər verir ki, San-Fransiskodakı Federal Dairə Məhkəməsinə təqdim olunan 22 səhifəlik şikayətdə Trampın federal qanunları və ABŞ Konstitusiyasını pozduğu bildirilir.

Ştat məhkəmədən Milli Qvardiyanın Los-Ancelesə yeridilməsinin ləğvini və şəhər üzərindəki nəzarətin qubernatora qaytarılmasını tələb edir.

"Tramp dəfələrlə fövqəladə səlahiyyətlərdən istifadə edərək qanuni icra hakimiyyəti səlahiyyətlərini aşır. 7 iyun, şənbə günü isə Kaliforniya ştatının suverenliyi və qubernatorun səlahiyyətləri bahasına daha bir presedentsiz addım atdı", - deyə iddiada vurğulanır.

Kaliforniyanın baş prokuroru Rob Bonta bildirib ki, Tramp 1970-ci ildən - eks-prezident Riçard Niksonun poçt tətili zamanı hərbçiləri prosesə cəlb etməsindən bəri ilk dəfədir bu qanunu tətbiq edib. Eyni zamanda bu, 1965-ci ildən bəri ilk haldır ki, prezident ştat qubernatorunun razılığı olmadan ordu yeridir.

Tramp Milli Qvardiyanı əla iş gördüyünə görə təqdir edib və bildirib ki, əgər hərbçilər olmasaydı, şəhər tamamilə yanardı. O, Kaliforniya və Los-Anceles rəhbərliyini zorakılığa qarşı tədbirsizlikdə ittiham edib və qubernatorun həbsini istisna etməyib.

Fatimə Şükürova // EDnews