Süni intellekt dövründə təhsil alıb peşə qazanmağa çalışan bir tələbəsinizsə, "Google"un süni intellekt bölməsinin baş direktoru Demis Hassabisin tövsiyələrinə diqqət yetirməyiniz tövsiyə olunur. O, süni intellekt və gələcək haqqında dəyərli fikirlər səsləndirib.

"EDnews" xəbər verir ki, "Google AI"ın baş direktoru Demis Hassabis süni intellektin əmək bazarını sürətlə dəyişdirdiyi bir dövrdə tələbələrə önəmli tövsiyələr verib.

Hassabis yeni dövrdə dəyərli bir peşəyə sahib olmaq istəyən tələbələrə elm, texnologiya, mühəndislik və riyaziyyat fənlərinə öncəlik verməyi və süni intellekt alətlərindən səmərəli şəkildə istifadə etməyi tövsiyə edir. O, süni intellektin gələcəkdə yeni və dəyərli iş yerləri yaradacağını və xüsusilə texniki bacarıqlara sahib şəxslərin bu sahədə uğurlu olacağını qeyd edir.

O, tələbələrin süni intellekt sistemlərinin necə işlədiyini anlamaq üçün riyaziyyat, fizika və kompüter elmi kimi təməl elmlərə diqqət yetirməli olduqlarını vurğulayır. Həmçinin, süni intellekt alətləri ilə praktiki təcrübə qazanmağın əhəmiyyətinə diqqət çəkərək, bu alətlərdən innovativ şəkildə istifadə edə bilənlərin rəqabət üstünlüyü əldə edəcəyini bildirir.

Hassabis gələcək nəsillərin süni intellektlə iç-içə böyüyəcəyini və buna görə də süni intellekt savadlılığının həyati bir bacarıq olacağını xüsusilə vurğulayır.

Hassabis, süni intellektin bəzi iş itkilərinə yol aça biləcəyi ilə bağlı narahatlıqlara baxmayaraq, insanın uyğunlaşma qabiliyyətinə inandığını və süni intellektin təsirini sənaye inqilabı ilə müqayisə edir. O, süni intellektin müştəri xidməti, məzmun yaradılması və proqramlaşdırma kimi funksiyaları üzərinə götürməsi ilə bu texnologiyalardan effektiv istifadə edə bilən işçilərin “super gücə” sahib olacağını bildirir. Hassabis, qarşıdakı 5-10 il ərzində süni intellektin yeni və dəyərli iş sahələri yaradacağını və texniki biliklərə malik şəxslərin bu dəyişikliklərin ön sıralarında yer alacağını vurğulayır.