Avstraliyada antisemitizm halları narahatedici səviyyəyə çatıb. Son günlərdə yəhudi icmasına qarşı tətbiq edilən məhdudiyyətlər, xüsusilə də vizaların qəfil ləğvi ilə bağlı xəbərlər cəmiyyətdə ciddi narahatlığa səbəb olub.

EDnews xəbər verir ki, Avstraliya Yəhudiləri Assosiasiyası (AJA) bu səbəbdən bütün dünyadakı yəhudilərə təcili xəbərdarlıq yayıb. Təşkilat qeyd edir ki, son hadisələr yəhudi icmasına və İsrailə qarşı artan düşmənçiliyin təzahürüdür və bu, həm də beynəlxalq münasibətlərə mənfi təsir göstərə bilər.

AJA-nın məlumatına görə, vizaların ləğvi hətta yüksəkvəzifəli şəxsləri də əhatə edir. Bu isə yalnız fərdi hüquqlara deyil, həm də diplomatik əlaqələrə təsir göstərmək gücünə malikdir.

Assosiasiya bütün dünyadakı yəhudi mənşəli insanlara Avstraliyaya səyahət planlarını ehtiyatla nəzərdən keçirməyi, hətta bəzi hallarda təxirə salmağı tövsiyə edir. Bu çağırış həm təhlükəsizlik, həm də hüquqi problemlərdən qorunmaq məqsədi daşıyır.

Mütəxəssislər hesab edirlər ki, bu cür hallar qeyri-tolerantlıq və dini ayrı-seçkiliyin genişlənməsinə şərait yarada bilər. Avstraliya hökuməti isə hələlik bu iddialarla bağlı rəsmi açıqlama yaymayıb.

Yaranmış vəziyyət beynəlxalq müşahidəçilər və hüquq müdafiəçiləri tərəfindən diqqətlə izlənir.

Fatimə Şükürova // EDnews