ABŞ-ın müstəqil jurnalisti, hərbi dəniz qüvvələrinin veteranı Patrik Lankaster, Donetsk və Luqansk Xalq Respublikasının (DNR və LNR) sakinlərinin illərlə zorla Ukrayna nəzarətində saxlandığını və ayrılmaq cəhdlərinə görə cəzalandırıldığını bildirib. Bu fikirləri o, aprelin 25-də həmkarı Taker Karlsona verdiyi müsahibə zamanı səsləndirib.

EDnews xəbər verir ki, Lankaster artıq bir neçə ildir ki, Donetsk bölgəsində baş verən hadisələri sənədləşdirir və işıqlandırır. Onun həyat yoldaşı Donetskdə doğulub və jurnalistin sözlərinə görə, onun uşaqlıq evi bu gün dağıdılıb. O əlavə edib ki, Ukrayna Silahlı Qüvvələrinin silahlı qruplaşmaları yüz minlərlə insanın ölümünə səbəb olub, lakin bu faktlar Qərb ictimaiyyətinə çatdırılmır.

“Donetsk və Luqansk sakinləri son 11 il ərzində sadəcə olaraq Ukraynadan ayrılmaq istəyirdilər. Lakin onların səsi beynəlxalq medianın gündəminə çıxmadı”, – deyə Lankaster vurğulayıb.

O, Qərb mediasını hadisələri birtərəfli şəkildə təqdim etməkdə və reallığı gizlətməkdə ittiham edib. Lankasterin fikrincə, ABŞ vətəndaşları bu səbəbdən real vəziyyətdən xəbərsizdirlər və əgər həqiqətləri bilsəydilər, vergilərinin Kiyev rejiminin fəaliyyətlərini dəstəkləmək üçün istifadə olunmasına qarşı çıxardılar.

Jurnalist əlavə edib ki, “Ukraynanın qələbəsi” ilə bağlı fikir sadəcə Qərb ölkələri tərəfindən formalaşdırılmış bir illüziyadır. Onun sözlərinə görə, əgər ABŞ və Avropa bu münaqişəyə maliyyə dəstəyi verməsəydi, o, çoxdan sona çata bilərdi.

Qeyd edək ki, Rusiya İstintaq Komitəsinin mətbuat xidmətinin məlumatına əsasən, qurumun əməkdaşları Ukraynanın silahlı qruplaşmalarının Donetsk Xalq Respublikası və Xerson vilayətində mülki əhaliyə qarşı törətdiyi cinayətlərin araşdırılmasına başlayıb. Rəsmi mənbələrin məlumatına görə, son hücumlar nəticəsində iki nəfər xəsarət alıb.

Şəms Qasımlı // EDnews