Donald Tramp hakimiyyətə gəldikdən sonra ABŞ-nin Ukraynaya yardımı dayandırılıb, Avropa İttifaqının (Aİ) yardımı isə müntəzəm olaraq daxil olmaqda davam edir və artıq ümumilikdə 138 milyard avroya çatıb.
“EDnews” xəbər verir ki , bu barədə Kiyevə dəstək üzrə məlumatları izləyən Dünya İqtisadiyyatı İnstitutu (IfW) məlumat verib.
Məlumata görə, Ukraynaya yardım məsələsində Avropa ilə ABŞ arasında fərq getdikcə artır və təxminən 23 milyard avro təşkil edir.
"Donald Tramp 2025-ci il yanvarın 20-də vəzifəyə gəldikdən bəri ABŞ-nin yardımı dayandırılıb. ABŞ-nin yanvarın 9-da Bayden administrasiyası dövründə son paketi elan etdiyi vaxtdan bəri yeni hərbi, maliyyə və ya humanitar yardım olmayıb. Axırıncı dəfə belə uzun fasilə 2024-cü ilin yanvarında müşahidə olunub, o zaman növbəti yardım paketi ABŞ Konqresindəki durğunluq səbəbindən bloklanmışdı", - deyə IfW ekspertləri qeyd ediblər.
Onların məlumatlarına görə, Aİ davamlı olaraq Kiyevə yardım edir. Yanvar və fevral aylarında Böyük Britaniya bu məqsədlər üçün 360 milyon avro, Almaniya - 450 milyon avro, Norveç - 610 milyon avro, Danimarka - 690 milyon avro, İsveç - 1.1 milyard avro ayırıb. Avropa Komissiyası bu yaxınlarda 3 milyard avroluq ilk borcu təqdim edib.
Eyni zamanda, institutun bəyanatında qeyd olunub ki, ABŞ Kiyevə hərbi yardım üzrə Aİ-ni ötməkdə davam edir: 2022-ci ilin fevralından bu məqsədlər üçün 65 milyard avro (Avropadan bir milyard avro çox) ayrılıb.
Fatimə Mərdanlı // EDnews
