Rusiya Fövqəladə Hallar Nazirliyi (FHN) Myanmada baş vermiş dağıdıcı zəlzələnin fəsadlarını aradan qaldırmaq məqsədilə bu ölkəyə əlavə olaraq üç humanitar yardım təyyarəsi göndərəcək.

“EDnews” xəbər verir ki, bu barədə Rusiya Federasiyasının Myanmadakı səfirliyinin konsulluq şöbəsinin rəhbəri Dmitri Borisov məlumat verib. Onun sözlərinə görə, yaxın günlərdə humanitar yardım daşıyan daha üç reysin ölkəyə çatacağı gözlənilir.

Humanitar yardım əməliyyatı Rusiya Prezidenti Vladimir Putinin göstərişi və Fövqəladə Hallar naziri Aleksandr Kurenkovun tapşırığı əsasında həyata keçirilir.

Nazirliyin məlumatına görə, artıq iki ədəd İl-76 tipli təyyarə Myanmaya 68 ton humanitar yardım çatdırıb. Yardıma ərzaq məhsulları, gündəlik istifadə üçün zəruri əşyalar, 150 ədəd çadır və 30-dan çox generator daxildir.

Rusiya FHN-in “Centrospas” qrupunun xilasedicisi Sergey Tsvetkov bildirib ki, hadisə yerində dağıntıların aradan qaldırılması zamanı təhlükəli şərait yaranır və bu, bəzən xilasedicilərin öz həyatına da risk yaradır. O, həmçinin qeyd edib ki, axtarış-xilasetmə işlərinin effektivliyi əsasən yerli hakimiyyət orqanları ilə qarşılıqlı əməkdaşlıqdan asılıdır.

Şəms Qasımlı // EDnews