ABŞ-da humanitar proqram çərçivəsində qanuni şəkildə yaşayan bir neçə ukraynalı, statuslarının ləğv edildiyini və ölkəni yeddi gün ərzində tərk etməli olduqlarını bildirən elektron məktublar alıblar.

“EDnews” xəbər verir ki,  uyğun məktublar ukraynalılara cümə axşamı, aprelin 3-də göndərilib. Məktublarda qeyd olunur ki, əgər onlar ölkəni tərk etməsələr, deportasiya ilə bağlı hüquq-mühafizə tədbirləri tətbiq oluna bilər.

''Əgər  ABŞ ərazisini dərhal tərk etməsəniz, sizə qarşı hüquq-mühafizə orqanları tərəfindən tədbirlər görülə bilər və bu, deportasiyanıza səbəb olacaq. Bir daha xatırladırıq: Daxili Təhlükəsizlik Nazirliyi (DHS) sizin humanitar statusunuzu ləğv edir. ABŞ-da qalmağa cəhd etməyin'', – məktublarda deyilir.

Lakin aprelin 4-də, cümə günü DHS nümayəndəsi bildirib ki, ukraynalılar bu məktubları səhvən alıblar. Humanitar proqram hələ də qüvvədədir.

"Unian"ın məlumatına görə, ABŞ prezidenti Donald Trampın administrasiyası müvəqqəti qanuni statusla yaşayan təxminən 240 min ukraynalının bu statusunu ləğv edəcək.

KİV-in Tramp administrasiyasındakı yüksək vəzifəli məmura istinadən yazdığına görə, bu addım Ukrayna vətəndaşlarını ABŞ-dan sürətlə deportasiya olunmaq təhlükəsi ilə üz-üzə qoya bilər.