Kanadanın Baş naziri Mark Karni cümə axşamı bildirib ki, Kanada və ABŞ arasında iqtisadi inteqrasiya və təhlükəsizlik sahəsində sıx əməkdaşlığa əsaslanan əvvəlki münasibətlər artıq keçmişdə qalıb.

"EDnews"un məlumatına görə, Karni bu açıqlamanı ABŞ Prezidenti Donald Trampın Kanadaya tətbiq etdiyi yeni tariflərə cavab olaraq verib.

"Ona görə də biz iqtisadiyyatımızı köklü şəkildə yenidən təsəvvür etməliyik", – deyə baş nazir vurğulayıb.

Karni əlavə edib ki, Kanada ABŞ-ın avtomobil tariflərinə qarşılıq olaraq ticarət cavab tədbirləri görəcək. O qeyd edib ki, bu addımlar ABŞ iqtisadiyyatına maksimum təsir göstərəcək, eyni zamanda Kanada üçün minimal təsirlərlə nəticələnəcək. Baş nazir, həmçinin, Kanadanın işçilərini və sənayesini qorumaq üçün bütün mümkün variantların nəzərdən keçirildiyini bildirib.

Baş nazirin sözlərinə görə, çərşənbə günü axşam Donald Trampın administrasiyası onunla telefon danışığı keçirmək üçün müraciət edib. Əgər bu görüş baş tutarsa, iki lider arasında ilk rəsmi əlaqə olacaq.

Eyni zamanda, çərşənbə günü Karni Kanada avtomobil sənayesini dəstəkləmək məqsədilə 2 milyard Kanada dolları (təxminən 1,4 milyard ABŞ dolları) dəyərində "strateji cavab fondu" yaradıldığını elan edib.

Xatırladaq ki, ABŞ Prezidenti Donald Tramp çərşənbə günü bütün idxal edilən avtomobillərə 25 faiz gömrük rüsumu tətbiq edildiyini açıqlayıb. Yeni rüsumlar gələn həftədən qüvvəyə minəcək.

Şəms Qasımlı // EDnews