Martın 4-də Konqresdə çıxışı zamanı Donald Tramp gözlənilmədən 2022-ci ildə ABŞ-da yarımkeçirici istehsalını bərpa etmək üçün qəbul edilən "CHIPS Act" qanununu tənqid edib. İki partiyanın dəstəyi və milyardlarla investisiyaya baxmayaraq, o, proqramı "dəhşətli” adlandıraraq, Nümayəndələr Palatasının spikeri Mayk Consonu onu ləğv etməyə çağırmışdı.
“EDnews” xəbər verir ki, "CHIPS" proqramı ABŞ-da zavodların tikintisi üçün 50 milyard dolların ayrılmasını nəzərdə tuturdu.
Bu qanunun qəbulundan sonra "Intel", "Samsung" və "TSMC" kimi şirkətlər Arizona, Nyu York və Ohayoda istehsal müəssisələri tikməyə başlamışdı. Ticarət Nazirliyi prosesi nəzarətdə saxlayırdı və subsidiyaların bölüşdürülməsinə cavabdeh idi.
Lakin Trampın tənqidindən sonra administrasiyanın artıq imzalanmış müqavilələri yenidən nəzərdən keçirə biləcəyi ilə bağlı narahatlıqlar yaranıb. Bəzi şirkətlər riskləri qiymətləndirmək üçün hüquqşünaslara müraciət edib, - NYT yazır. Respublikaçı senator Todd Yanq, əvvəllər "CHIPS" proqramını dəstəkləyən siyasətçilərdən biri kimi, Ağ Evdən izahat tələb edib, çünki indiyə qədər administrasiya bu proqramın tərəfdarı olub.
Eyni zamanda, Tramp administrasiyası artıq proqramı ixtisar etməyə başlayıb. Fevralda Ticarət Nazirliyi "CHIPS Office"-də 40 nəfəri işdən çıxarıb. Namizədlərlə müsahibə aparan vəzifəli şəxs Maykl Qrayms, müraciət edənlərdən IQ və ya SAT testlərinin nəticələrini təqdim etməyi və riyazi məsələləri həll etməyi tələb edib.
Tramp subsidiyaları xaricdə çip istehsalını bahalaşdıracaq gömrük rüsumları ilə əvəz etməyi təklif edib. Onun sözlərinə görə, bu siyasət artıq TSMC-ni ABŞ-dakı investisiyalarını 100 milyard dollar artırmağa məcbur edib. Lakin ekspertlər bildirirlər ki, şirkət bu genişlənməni gömrük tarifləri təhdidindən əvvəl də planlaşdırırdı.
Hüquqşünaslar qeyd edirlər ki, rüsumlar çip idxalına ciddi təsir etməyə bilər, çünki çiplərin əksəriyyəti birbaşa ABŞ-a gətirilmədən Asiyada cihazlara quraşdırılır.
Bütün bu qeyri-müəyyənliyə baxmayaraq, çoxlu şirkət hökumətlə müqavilələrinin qüvvədə qalacağına əmindir. Bununla belə, "CHIPS Act"-in gələcəyi sual altındadır və sənaye bu proqramı qorumaq üçün mübarizəyə hazırlaşır.
