Yuta ştatından olan respublikaçı senator Mayk Li deyib ki, ABŞ NATO-dan çıxmalıdır.

"EDnews" xəbər verir ki, bu barədə o, “X” sosial şəbəkəsində yazıb.

Sloveniyanın NATO-ya kifayət qədər töhfə vermədiyini bildirən ABŞ prezidentinin xüsusi tapşırıqlar üzrə xüsusi nümayəndəsi Riçard Qrenellin şərhinə senator “NATO-dan çıxmaq vaxtıdır” yazıb.

Bu arada “Washington Post” qəzeti mənbələrə istinadən məlumat verib ki, ABŞ prezidenti Donald Tramp 20 min Amerika əsgərinin Avropadan çıxarılmasına göstəriş verə bilər ki, bu da Avropanın təhlükəsizliyi üçün əsl kabus olacaq:

“Tramp administrasiyasının avropalı müttəfiqləri ilə dərinləşən fikir ayrılığı və Amerika qoşunlarının sayını azaltmaq təklifləri Avropanın İkinci dünya müharibəsindən bəri təhlükəsizliyinin əsasını təşkil edən ABŞ ilə 80 illik müqaviləyə qitənin hələ də nə qədər arxalana biləcəyi ilə bağlı narahatlığını artırıb”.

Qeyd olunub ki, Avropa liderləri Amerika kontingentinin hər hansı ixtisarı baş verərsə, bunun Vaşinqton və Moskva arasında danışıqların nəticəsi olmayacağına dair zəmanətlərə sahib olmaq istəyirlər.

ABŞ prezidenti Donald Trampın özü bəyan edib ki, təşkilata üzv olan digər ölkələr maliyyə öhdəliklərini yerinə yetirməsə, ABŞ NATO-dan çıxa bilər.

Dekabrın 3-də İsveçrə parlamentinin üzvü Jaklin De Kuatro isə bildirib ki, ABŞ-nin NATO-dan mümkün çıxması hərbi bloku zəiflədəcək. Öz növbəsində ABŞ dövlət katibi Marko Rubio NATO üçün yeganə təhlükəni hərbi blokda zəif orduya malik ölkələrin olması adlandırıb.