Nobel Sülh Mükafatı laureatı Məhəmməd Yunus baş nazir Şeyx Hasinanın istefasından sonra Banqladeşin müvəqqəti hökumətinin rəhbərlərindən biri ola bilər.
Ednews xəbər verir ki, bu barədə "AFP" nəşri yazıb.
Tələbələrin Ayrı-seçkiliyə Qarşı Təşkilatının (SAD) baş lideri Nahid İslam, "Biz qərara gəldik ki, beynəlxalq aləmdə tanınmış Nobel mükafatı laureatı, geniş məqbul sayılan doktor Məhəmməd Yunusun baş məsləhətçi olacağı müvəqqəti hökumət formalaşsın" - deyə video-müraciətində bildirib.
Avqustun 5-də etirazçılar Banqladeşin Baş naziri Şeyx Hasinanın Dəkkdəki rəsmi iqamətgahına basqın ediblər. Hasina istefa verib və ölkəni tərk edərək Hindistana qaçıb. O, İngiltərədən sığınacaq istəyib.
Banqladeşdə iğtişaşlar 2024-cü ilin iyun ayında tələbələrin məşğulluq kvotası ilə bağlı etirazları fonunda başlayıb və bu günə qədər davam edir. Etirazçılarla döyüşmək üçün ordu cəlb edilib.
Qeyd edək ki, Məhəmməd Yunus özünün qabaqcıl mikromaliyyə bankı ilə milyonları yoxsulluqdan qurtardığına görə tanınan, mikrokreditin atası hesab olunan, iqtisadçı professor, sosial və iqtisadi inkişafın əsaslarının yaradılması sahəsindəki səylərinə görə 2006-cı il Nobel mükafatı laureatına layiq görülüb.
Xatırladaq ki, M.Yunus sonuncu dəfə Bakıda bu ilin mart ayında səfərdə olub.
Əkbər Novruz
