Türkiyə Təhsil Vəqfi İzmir Şöbəsi tərəfindən Çeşmə Açıq Hava Teatrında təhsilin xeyrinə konsert təşkil olunub. Tamaşaçılarla dolu olan teatrda konsert verməyə hazırlaşan Yunan müğənni Despina Vandi Çeşmə konsertindən əvvəl səhnədəki Türkiyə bayrağı və Atatürk afişasının endirilməsini istəyib.
Cavab olaraq Çeşmə Bələdiyyə Başçısı Lal Dənizli sərt reaksiya göstərib, müğənnidən şəhəri tərk etməsini tələb edib.
Ednews "Hürriyet"ə istinadən xəbər verir ki, səhnəyə çıxan Çeşmə Bələdiyyə Başçısı Lal Dənizli bildirib:
“O, türk bayrağının və Atatürkün portretinin endirilməsini istəyirdi. Ona görə də beləsini gözləməyin. Məncə o, sizin sevginizə layiq bir insan deyil. Bu torpaqları qazanmaq üçün çox şəhid verdik. Buna baxmayaraq, biz qardaşlığın və əbədi dostluğun həmişə qalib gələcəyinə inanan insanlarıq”.
Baş verənlərin yunan müğənniyə dərs olacağına ümid etdiyini ifadə edən Dənizli deyib: “Heç bir güc nə bayrağımızı, nə də Atatürkün plakatını endirməyə cəhd edə bilməz. Bunu ağlına belə gətirə bilməz. Xanım bu şəhərin sərhədlərini dərhal tərk etməlidir. Sakit və dinc şəkildə. Ümid edirəm ki, müğənni başqa ölkələrdə konsert verməyə hazırlaşanda da dövlətlərin rəmzinə çevrilən bayraqları endirməyi ağlına belə gətirməyəcək. Qoy, bu, ona tarixi dərs olsun!”.
Əkbər Novruz
