İran Prezidenti İbrahim Rəisi ötən gün helikopter qəzasında həyatını itirib. Helikopterin göyərtəsində, eyni zamanda xarici işlər naziri Hüseyn Əmir Abdullahian, Şərqi Azərbaycan vilayətinin general-qubernatoru Malek Rəhməti, Təbrizin imamı Məhəmməd Əli Haşemi də olub.

Qəza xəbərinin ardından İbrahim Rəisi ilə bağlı araşdırmalar başlayıb. Bəs, İran prezidenti İbrahim Rəisi kimdir?

1960-cı il noyabrın 4- də İranın şimal-şərqindəki Məşhəd şəhərində anadan olan Seyyid İbrahim Rəisi təhsilini şiə İslamının intellektual mərkəzi sayılan Qumda başa vurub. 

1975-ci ildə Şah Rza Pəhləvi hakimiyyətinə qarşı narazılığın artdığı bir vaxtda o, bu şəhərdə ölkənin aparıcı iranlı din alimləri ilə görüşlərdə iştirak edir, İran inqilabının memarı Xomeyninin inqilab ideyasından təsirlənir. 

Hüseyn Əli Müntəzeri 1988-ci ildə İran siyasi məhbuslarının edamında iştirak edən dörd nəfərdən biri kimi Rəisinin adını çəkib. Rəisi 1989-1994-cü illərdə Tehran prokuroru, 1994-2004-cü illərdə Ruhanilər üzrə Xüsusi Məhkəmənin baş prokuroru, 2004-2014-cü illərdə isə Ali Apellyasiya Məhkəməsinin birinci hakimi vəzifələrində çalışıb.

2009-cu il prezident seçkilərindən sonra baş verən etirazların yatırılmasında mühüm rol oynayan Rəisi 2016-cı ildə Ayətullah Xamenei tərəfindən ölkənin ən böyük vəqfi olan “Astan-e Quds Razavi”nin rəhbəri təyin edilib.

O, 2017-ci ilin mayında İran prezidentliyinə namizədliyini irəli sürsə də, həmin dövrdə Prezident Həsən Ruhaniyə məğlub olub.

İbrahim Rəisi 2019-cu ildə Ədliyyə Başçısı olub. Vəzifəyə gələn kimi dövlət məmurlarına və aparıcı iş adamlarına qarşı korrupsiya işi açan Rəisi keçmiş Ruhani hökumətini tənqid etməyə davam edib.

İslam Respublikasının son Prezidenti 2021-ci ildə keçirilən 13-cü prezident seçkilərində rəqibi Həsən Ruhaniyə qalib gəlmişdi.  İranda keçirilən seçkilərin rəsmi nəticələrinə görə, İbrahim Rəisi ölkənin 8-ci prezidenti olub.

Rəisi 1983-cü ildə fəlsəfə elmləri doktoru, yazıçı Jamileh Alamolhoda ilə ailə qurmuşdu, iki qızı var.

Aynurə İsmayıl