Azərbaycan Şahmat Federasiyasının vitse-prezidenti, beynəlxalq dərəcəli hakim Faiq Həsənovun adı növbəti dəfə Ginnesin Rekordlar Kitabına düşə bilər.
“EDnews” xəbər verir ki , bu barədə "Report"a açıqlamasında 85 yaşlı mütəxəssis bildirib.
O, ilk olaraq ən uzunmüddətli hakim kimi Ginnesin Rekordlar Kitabında yer alması ilə bağlı fikirlərini bölüşüb:
"Bura düşmək olduqca çətindir. Çünki tələblər ağırdır. O qədər suallar var ki... Onların hamısına sənədlərlə cavab verməlisən. 1964-cü ildə yarışlara ilk dəfə hakim kimi dəvət almışam. Ondan sonra bir neçə turnirdə də iştirak etmişəm. Ardınca Zaqafqaziya çempionatında hakimlik etmişəm. 1969-cu ildən Azərbaycanda şahmat verilişi aparıram. 1972-ci ildə Bakıda keçirilən SSRİ çempionatında baş hakimin köməkçisi olmuşam. Ondan sonra hakimliyə diqqət yetirdim, FIDE-nin bir çox yarışlarında iştirak etdim".
F.Həsənov ən uzunmüddətli şahmat verilişinin layihə rəhbəri və aparıcısı kimi də Ginnesin Rekordlar Kitabına düşə biləcəyini vurğulayıb:
"Buna baxış davam edir. Dünyada ən uzunmüddətli şahmat verilişi də Ginnesin Rekordlar Kitabına düşə bilər. Çünki orada ən uzunmüddətli olan 43 il davam edib. Bizdə isə dəqiq 55 ildir. Buna da baxılır. Təsdiq olunmasını gözləyirik".
Fatimə Mərdanlı // EDnews
