"Azərbaycanın idman ölkəsi kimi uğurları ilbəil artır. 33-cü Paris Yay Olimpiya Oyunlarında əldə etdiyimiz qələbə bunu bir daha təsdiqlədi. Azərbaycan idmançıları bu yarışlarda da ölkəmizi layiqincə təmsil etdilər. Dövlət başçımızın da söylədiyi kimi, bizim Olimpiya Oyunlarındakı uğurlarımız göstərir ki, Azərbaycan güclü idman dövlətidir. Dünyanın ən güclü 30 ölkəsinin arasında yer almaq, 5 idman növü üzrə 2 qızıl, 2 gümüş və 3 bürünc medal qazanmaq, müsəlman ölkələri arasında üçüncü yerdə qərarlaşmaq doğrudan da böyük uğurdur. Bununla belə, hədəfimiz daha böyük uğurlar əldə etməkdir".
Bu fikirləri Ednews - a Milli Məclis deputatı Könül Nurulllayeva deyib. O, bildirdi ki, ümumiyyətlə, Azərbaycanda idmanın inkişafı ardıcıl xarakter daşıyır və idmanın bir çox növləri inkişaf etməkdədir.
"İdmançılarımızın əldə etdiyi hər yeni qələbə ölkəmizdə idmana marağı daha da artırır. Uşaqların, yeniyetmələrin idmana axını müşahidə olunur. Bu isə idmanın kütləviliyinə, fiziki, mənəvi cəhətdən sağlam, vətənpərvər gənc nəslin yetişməsinə töhfə, gələcək üçün böyük perspektivdir. Dövlət başçımız idmançıları qəbul edərkən bəyan etdi ki, yeni hazırlıq prosesinə start veriləcək, həm Avropa, həm dünya çempionatlarına hazırlıq işləri gedəcək. Bu isə o deməkdir ki, biz növbəti Olimpiya Oyunlarına da indidən hazırlaşmalıyıq. Bir sözlə, qələbələrimizin davamlı olması üçün indidən hazırlıq görməliyik. Ümumiyyətlə, son illər Azərbaycanın idman ölkəsi kimi nüfuzu artmaqdadır. Bakıda və regionlarda ən nüfuzlu dünya və Avropa yarışları təşkil olunmaqdadır. Təsadüfi deyil ki, beynəlxalq idman təşkilatlarının rəhbərləri yarışlarda nümunəvi təşkilatçılığa görə razılıqlarını ifadə edirdilər. İlk Avropa Oyunları, İslam Həmrəylik Oyunları, bir çox mötəbər beynəlxalq idman tədbirləri ölkəmizin növbəti uğuru kimi tarixə həkk olunub. Bu uğurları davam etdirmək üçün bizdə həm siyasi iradə, həm də Azərbaycan idmançılarının böyük potensialı var".
Əkbər Novruz
