Rusiya prezidenti Vladimir Putinin avqustun 18-i Azərbaycana rəsmi səfər edərək Azərbaycan Respublikasının prezidenti İlham Əliyevlə ikitərəfli görüş keçirtməsi regionda və dünyada baş verən hadisələrlə bağlı aparılacaq müzakirələrə diqqət çəkib.
Moskva-Bakı arasında keçirilən bu görüşün əsasə hədəfləri nədir?
Mövzu ilə Ednews-a açıqlama verən siyasi ekspert Samir Hümbətov görüşün nəinki Cənubi Qafqazda, həmçinin dünyada baş verən prosesləri əhatə edəcəyini bildirib:
“Rusiya prezidenti Vladimir Putinin Azərbaycana səfər etməsi təbii ki, boşuna deyil. Əvvəla bu altı ildən sonra yenidən gerçəkləşən dövlət səfəridir. Bundan əlavə, Putinin səfəri regionumuzda dəyişən vəziyyətlə bağlıdır. Məlumdur ki, Ukraynanın Rusiya ərazisinə daxil olması, Ukraynada gedən müharibə, İsrail-HƏMAS qarşıdurması və son vaxtlarda Qərbin Ermənistanı sürətli şəkildə silahlandırması prosesi baş verir. Bunların fonunda regionda yeni bir güc dəyişimi prosesi gedir.
Azərbaycanın İkinci Qarabağ müharibəsində qalib olması, sərhədlərin delimitasiya və demarkasiyasının davam etdiyi bir vaxtda bu prosesin dayandırılması və Ermənistan tərəfinin danışıqlardan imtina etməsi və s. bu dəyişən proseslərə aiddir. Rusiya artıq iki yüz ildən çoxdur ki, Cənubi Qafqazda mövcuddur. Buna görə də hesab edirəm ki, indiki halda Moskvanın bu səfəri həyata keçirtməsində məqsədi regionda dəyişən strateji hədəflərlə də bağlı ola bilər.”
Eskpert bildirib ki, ikitərəfli görüş zamanı Rusiya qazının Azərbaycan üzərindən dünya bazarına çatdırılması məsələsinin müzakirə olunacağını bildirib:
“Nəzərə almaq lazımdır ki, Azərbaycanın həm nəqliyyat-kommunikasiya, həm də enerji resursları baxımından tutduğu mövqeye görə bir çox dövlətlərin Azərbaycana qarşı müsbət yanaşmasına səbəb olub. Ona görə də belə düşünürəm ki, Putinin səfəri istər Rusiya qazının Azərbaycan üzərindən dünya bazarına çıxarılması, istərsə də Şimal-Cənub dəhlizi vasitəsi ilə iqtisadi əlaqələrin genişləndirilməsi və s. kimi məsələləri əhatə edə bilər. Burada aparılacaq danışıqlar həm Rusiya, həm də Azərbaycan baxımından böyük əhəmiyyətə malikdir. Düşünürəm ki, Putinin səfəri burada ikili münasibətlərin siyasi, iqtisadi və hərbi sahələrdə əməkdaşlığının inkişaf etdirilməsi yönündədir. Təbii ki, buraya Cənubi Qafqazda və qlobalda baş verən hadisələr də aiddir.”
Fərid Axund
