Son aylarda Ermənistan-Azərbaycan arasında sülh müqaviləsinin əldə edilməsi gündəmə gəlsə də, Ermənistan tərəfinin Azərbaycanın tələblərini yerinə yetirməməsi bu prosesi gecikdirir. Bundan başqa, bir çox xarici qüvvələrin də bu sülh prosesinə təsir etdiyi heç kimə sirr deyil.

Cənubi Qafqazda yaradılacaq sülh şəraitinə hansı qüvvələr mane olur?

“Rusiya-Ukrayna müharibəsi, Amerikada prezident seçkiləri, prezident Makronun siyasi zəifləməsi və Avropa Parlamenti daxilində baş verən proseslər Azərbaycan-Ermənistan sülh prosesini bir az da arxa plana salıb.”

Bu fikirləri Ednews-a açıqlamasında professor, Macarıstanın Beynəlxalq Münasibətlər İnstitutunun baş məsləhətçisi Lazlo Vaşa bildirib. Professor bildirib ki, önəmli quru yollarının üzərində yerləşdiyinə görə bütün dövlətlər Cənubi Qafqaz regionunun təhlükəsizliyində maraqlıdır:

“Ümumiyyətlə, demək olar ki, Qərbi Avropa istisna olmaqla dünya ölkələri faktiki olaraq regional konsolidasiyada maraqlıdır. Çin və Şərqi Avropa ölkələrinin bunda xüsusi marağı var, çünki Şərqlə Qərb arasında quru yolları getdikcə daha çox Azərbaycanın əsas oyunçu olduğu Orta Dəhlizə keçir. Ona görə də, hər kəs bu regionun təhlükəsizliyində maraqlıdır.”

Professor Cənubi Qafqazda sülh prosesinə mane olan ölkələrin bu münaqişələrdən qazan əldə etdiyini bildirib:

“Fransa tərəfindən liderlik edilən və liberal əsaslara dayan bəzi Avropa ölkələri sülh prosesinin qarşısına daim maneələr qoyur. Bunun səbəbi bir tərəfdən Fransadakı erməni diasporunun güclü siyasi gücüdürsə, digər tərəfdən də bu münaqişənin tərəflərinə silah sataraq qazanc əldə edən ölkələrdir. Onu da unutmaq olmaz ki, ABŞ və onun avropalı müttəfiqləri Moskvanı zəiflətmək üçün Rusiyanın ənənəvi təsir dairələrində qeyri-müəyyən vəziyyətlər yaratmaq niyyətindədirlər.”

Fərid