Yaxın günlərdə keçirilən NATO-nun zirvə görüşü dünya dövlətləri baş verən münaqişələrin həlli yönündə danışıqlar aparıb. Qeyd edək ki, görüşdə Azərbaycan və Ermənistanın rəsmiləri də iştirak edib. 

Keçirilən NATO görüşü Azərbaycanla Ermənistan arasında sülh müqaviləsi bağlanılmasına necə təsir edə bilər?

“NATO sammiti çərçivəsində baş tutan görüşdən xüsusi bir nəticə gözləmirəm. Ola bilər ki, hər hansısa detallarla bağlı razılaşma əldə olunsun. Amma, bu sammit çərçivəsində yekun sülh müqaviləsinə nail olmaq mümkün deyil.”

Bu fikirləri Ednews-a açıqlamasında politologiya elmi üzrə ekspert Samir Hümbətov bildirib. O, həm də qeyd edib ki, yekun sülh sazişinin bağlanılması birbaşa Ermənistanın qarşısına qoyulan tələbləri yerinə yetirməsindən asılıdır:

“Birincisi, Ermənistan hələ ki bəzi əhəmiyyətli addımları atmayıb. Misal üçün Ermənistan hələ ki, konstitusiyasında dəyişiklik etməyib. Əgər İrəvan rəhbərliyi deyirsə ki, bu dəyişiklik 2026-cı ildə baş tutacaq, o zaman biz yekun sülh sazişi üçün bu vaxta qədər gözləyəcəyik. Sülh müqaviləsinin imzalanması Ermənistan konstitusiyasının dəyişməsindən asılıdır. Bu aydın məsələdir ki, konstitusiya dəyişmirsə sülh müqaviləsindən danışmaq gülüncdür.”

Ekspert bildirib ki, Cənubi Qafqazda dünyanın bir sıra güclü dövlətlərinin maraqları olduğu üçün Qərb burada öz müddəalarını tək başına irəli sürə bilməz:

“Cənubi Qafqazla bağlı Çin, Hindistan, Rusiya, İran, Türkiyə və Qərbin müxtəlif maraqları var. Bu halda Qərbin regionda sülh müqaviləsi üçün öz istəyinə uyğun müddəalarını irəli sürməyi real görsənmir. Bu baxımdan düşünürəm ki, tərəflər bu sammit çərçivəsində hər hansı anlaşmanı əldə edə bilərlər. Amma, yekun sülh müqaviləsi demək deyil, sadəcə sülh müqaviləsinə gedən yolda əldə olunan anlaşmadır. Nəzərə alaq ki, bu anlaşmanın hələ icrası da var. Hər əldə olunan razılaşma icra edilmir. Düşünürəm ki, yekun sülh müqaviləsi Azərbaycanın Ermənistan qarşısında qoyduğu tələbləri yerinə yetirməsindən asılıdır.”

Fərid