İranda növbədənkənar prezident seçkilərinin ikinci turunda səsvermə başlayıb. Bəs, seçkilərin İran-Azərbaycan münasibətlərinə, o cümlədən İranın regional münasibətlərinə təsiri necə olacaq? 

Məsələ ilə bağlı Ərəb Siyasi və Strateji Araşdırmalar Mərkəzinin direktoru, Dr. Məhəmməd Sadiq İsmayıl Ednews-a özəl açıqlama verib.
Onun sözlərinə görə, son dövrlərdə İranın xarici siyasəti çox dəyişməyib, çünki İran həm mühafizəkarlar, həm də islahatçılar tərəfindən idarə olunub, buna baxmayaraq, İranın xarici siyasətində ciddi dəyişiklik görmədik.

“Xamneyinin Səid Cəliliyə dəstək verməsi prezident seçkilərinin nəticələrinə ciddi təsir göstərə bilər. Hesab edirəm ki, Xamneyinin Səid Cəliliyə dəstək verməsi prezident seçkilərinin nəticələrinə təsir göstərə bilər, lakin bildiyimiz kimi, İrandakı siyasi sistem İranın ali dini lideri Əli Xamneyinin nəzarətinə əsaslanan bir sistemdir və onun səlahiyyətləri ölkə prezidenti səlahiyyətlərindən daha böyükdür”.

S.İsmayıl seçkilərdən sonra İran-Azərbaycan münasibətlərində dəyişiklik olmayacağını deyib:
“İran-Azərbaycan münasibətlərinə gəlincə, bu münasibətlər sabit olaraq qalacaq  və dəyişməyəcək. İranın Qərblə münasibətlərinə gəlincə, Səid Cəlili seçkilərdə qalib gəlsə, İran nüvə proqramını davam etdirməkdə və ABŞ-la münasibətləri normallaşdırmamaq da israrlı olacaq. 
Cəlili,  İranın nüvə proqramının iştirakçılarından və Qərblə yaxşı münasibətlər qurmaqdan imtina edənlərdən biridir. 

Lakin Pezeşkian qalib gəlsə, hesab edirəm ki, vəziyyət bir qədər fərqli olacaq, yəni İranın xarici siyasətində nisbi sakitlik olacaq”.

Loğman Yunis