Revanşist keşiş Baqrat Qalstanyan yenidən Baş nazir Nikol Paşinyana qarşı etiraz aksiyasına başlayıb. Qalstanyan bu dəfəki cəhdinin həlledici olacağını bəyan etmişdi. Revanşistlərin hakimiyyəti ələ keçirmək şansları nə qədərdir? Hətta burada Rusiyanın informasiya dəstəyi də başlayıb. Kremlə bağlı ekspertlər də danışırlar. Rusiya niyə səssizliyini pozdu?
Bu barədə Ednews-a açıqlamasında siyasi şərhçi Əlimusa İbrahimov bildirdi ki, arxiyepiskop Baqrat Qalstanyanın son iki gündə etiraz çıxışlarını intensivləşdirmək üçün dəridən-qabıqdan çıxdığı müşayiət olunur. Yəni həm nümayişlərdə iştirak edən qüvvələr, həm də onun arxasında dayananlar bu cəhdlərinin də boşa çıxdığını artıq hiss etməyə başlayırlar. Amma hiss etmək başqa, hiss etdiyini qəbul etmək başqa məsələdir:
"Onlar növbəti uğursuzluğa uğradıqlarını qəbul etmək istəmirlər. Çünki bunu qəbul etmək siyasi mübarizənin, hakimiyyət ümidlərinin sonu mənasını verir. Məhz buna görə də Baqrat və onun arxasındakılar qarşıdurmanın davam etdirilməsi üçün yeni-yeni taktiki gedişlər axtarışındadırlar. Baqrat hər gün başına toplaşan Qarabağ erməni klanının tör-töküntülərinə səslənərək onları etiraz aksiyalarına çağırır və hər gün də növbəti aksiyanın həlledici olacağı anonsunu verir. Amma Paşinyana qarşı həlledici an gəlib çıxmaq bilmir.
Politoloq qeyd etdi ki, arxiyepiskop özü də hazırda nə etmək lazım olduğunu bilmir və onun atdığı addımlar xaotik impulslardan başqa bir şey deyil.
"Paşinyan bu dəfə də müxalifətlə mübarizədə qalib gəldi demək olar. Hər dəfə olduğu kimi bu dəfə də o mübarizədən təkcə qalib çıxmadı, hətta bir qədər də güclü çıxdı. Yəni onun mövqeyi həm Ermənistan daxilində, həm də beynəlxalq dairələrdə güclənmiş oldu. Baş Naziri hakimiyyətdə salmağa çalışan Robert-Serj tandemi öz addımları ilə Paşinyanın mövqelərini daha da möhkəmləndirdilər və ona qarşı mübarizəni çətinləşdirdilər.
Müxalifət qüvvələrinin növbəti uğursuzluğu fonunda Nikol Paşinyan Azərbaycanla bundan sülh müqaviləsinin imzalanması istiqamətində daha cürətli addımlar ata biləcək. Yaxın günlərdə biz bu addımlar haqqında məlumat alacağıq".
Oğuz
