Haaqada Beynəlxalq Ədalət Məhkəməsində İrqi ayrı-seçkiliyin bütün formalarının ləğvi haqqında Beynəlxalq Konvensiyanın tətbiqi (Ermənistan Azərbaycana qarşı) üzrə Azərbaycan tərəfindən qaldırılan ilkin etirazlar üzrə keçirilən ictimai dinləmələr zamanı Ermənistan nümayəndəsi Yeqişe Kirakosyan çıxışı zamanı çox kobud bir səhv və əsassız fikirlər səsləndirib.

Ednews-un məlumatına görə, nümayəndə çox cəsurca, lakin heç bir istinad və ya sübut olmadan Azərbaycanın haqlı mina iddialarını "təkzib" edib.

“Qarabağ ərazisində yerləşdirilən minaların çoxunu Azərbaycan yerləşdirib. Məhz Azərbaycan Dağlıq Qarabağda fəaliyyət göstərən yeganə humanitar minatəmizləmə təşkilatını qara siyahıya salmaqla, eləcə də onun fəaliyyətini cəzalandırmaqla onilliklər ərzində Dağlıq Qarabağda minaların təmizlənməsinə şiddətlə mane oldu. Və Azərbaycan indi yurisdiksiya problemimizdən xilas olmaq üçün öz mina iddialarını fərqli üsullarla formalaşdırmağa çalışsa da olduqca qüsurludur".

Maraqlıdır ki, o, çıxışını davam etdirib, vurğulayır ki, Beynəlxalq Ədalət Məhkəməsi bu çərçivədə Azərbaycan iddialarını ləğv etməlidir.

Halbuki, Azərbaycanın mülki ərazilərdə partlayıcı sursat və minaların olması ilə bağlı iddiası Məhkəmə Reqlamentinin 75-ci maddəsinin 3-cü bəndinə əsasən əsaslanır. Ərazidə Azərbaycan Respublikasının Minatəmizləmə Agentliyi ilə birlikdə Beynəlxalq Avrasiya Mətbuat Fondu, APOPO, MAG kimi beynəlxalq təşkilatlar iştirakı nəticəsində ərazidə Ermənistan tərəfindən məskunlaşdırılmış minalar aşkara çıxarılmış və dəfələrlə işıqlandırılmışdır. Çox uzağa getməsək, elə aprelin 18-də ABŞ-ın Azərbaycandakı səfiri Mark Libbi və səfirliyin nümayəndələri Ağdam rayonunun işğaldan azad edilmiş ərazilərində səfərdə olublar. Nümayəndə heyəti Ağdamda fəaliyyət göstərən minaaxtaranları ziyarət ediblər və reallıqların tam şahidi olublar. 

Əkbər Novruz