Qazaxın 4 kəndinin Azərbaycana qaytarılması barədə Ermənistanla razılıq əldə edilib. Bundan sonra sülh müqaviləsi də bağlana bilər? Nəhayət ki, Qafqaza barış, sülh gələcək ?

Ednews məsələ ilə bağlı region ekspertləri ilə sorğu keçirib:

Gürcü siyasi ekspert Gia Xuxaşvili hesab edir ki, hələlik sülh barəsində danışmaq tezdir:

“Azərbaycan dövlətin ərazi bütövlüyünün bərpası problemini praktiki olaraq həll edib, ona görə də indiki mərhələdə əldə olunanların toxunulmazlığı haqqında müvafiq təminatları olan sülh müqaviləsi haqqında düşünməyin vaxtı çatıb. Lakin təəssüf ki, Qafqazda sülhdən danışmaq hələ tezdir, çünki Gürcüstanın ərazi bütövlüyü, Qərblə Rusiyanın maraqlarının toqquşması ilə bağlı problemlər qalmaqdadır. Amma təbii ki, Azərbaycanın uğurları regionumuzda sülh və firavanlıq yolunda yaxşı zəmin yaradacaqdır”.

Cənubi Qafqaz regionu üzrə siyasi ekspert Arnold Stepanyan baş tutan görüşü yüksək qiymətləndirib, lakin onun zənnincə əsas imtahan qarşıdadır:

“Almatı bəyannaməsi prinsipləri əsasında delimitasiya prosesinin başlanması faktı önəmlidir. Hər iki tərəf delimitasiya prosesində orada təsbit olunmuş prinsipləri rəhbər tutacaqlarını təsdiqləyib. Sülhün əldə olunması şansı xeyli artıb, baxmayaraq ki, əminəm ki, həm texniki, həm də siyasi baxımdan çoxlu maneələr olacaq. Əgər hər iki ölkənin rəhbərliyi müşayiət olunan çağırışların öhdəsindən gələ bilsə, o zaman ümid edirəm ki, yaxın gələcəkdə ölkələr sivil münasibətlərə qayıdacaqlar. Əsas imtahan hələ qarşıdadır və məncə, bu, anklav və eksklav məsələsidir”.

Əkbər Novruz