Böyük Britaniyanın dövlət naziri Ceyms Hippi Rusiya müdaxilə edəcəyi təqdirdə, Ermənistana hərbi dəstək verəcəklərini açıqlayıb. Britaniyalı nazirin mesajını necə şərh etmək olar, ümumiyyətlə, proses Ermənistana müdaxiləyə qədər gedəcəkmi?

Mövzu ilə bağlı Ednews-a danışan siyasi şərhçi Natiq Miri bildirdi ki, Hippinin açıqlamasının əsas qayəsi daha çox Ermənistan rəhbərliyini cəsarətləndirmək, ürəkləndirməkdən ibarətdir: 

“Dolayısı ilə Paşinyana mesaj verilir ki, nüvəsi Rusiya olan bütün ittifaqlardan tədricən çəkilsin. Və Rusiyanı Ermənistandan tamamilə çıxara bilsin. Konkret olaraq dəstək məsələsinə gəlincə bu qeyri-müəyyən ifadədir. Rusiya müdaxilə edərsə ingilislərin Ermənistana qoşun göndərəcəyi anlamına gəlməz. Çünki heç bir britaniya əsgəri ermənilər üçün Ermənistanın paytaxtında ölmək istəməz. Bu Böyük Britaniyanın maraqlarına uyğun davranış deyil. Çünki Böyük Britaniya ABŞ kimi birbaşa hansısa müharibədə tərəf olaraq iştirak etdiyi on illərdi ki, görülmür. Hər zaman müəyyən muzdlu proksi və terrorçu qüvvələrin vasitəsi ilə prosesdə birbaşa deyil dolayısı ilə iştirak edərək qarışı tərəfi zəyiflətməyə, öz geosiyasi maraqlarını qəbul etdirməyə çalışırlar. Burda da belədir. Bir tərəfdən Paşinyana cəsarət verirlərsə, o biri tərəfdən də dolayısı ilə Ermənistana tək olmadığı və qərbin onların yanında olduğu mesajını verirlər. Ceyms Hippinin məlum açıqlaması həm də Rusiya üçün müəyyən mənada çəkindirici məqam, xarakteri daşıyır. Yəni Rusiya heç də Ermənistanı zəyif bilib, qəfil hərbi müdaxiləyə qalxarsa bu Rusiya üçün Ermənistanda ikinci cəbhənin açılması demək olacağı mesajı verilir. İndiki Ukrayna müharibəsi fonunda Rusiya üçün o qədər də arzuolunan bir situasiya deyil”. 

Oğuz