Ötən gün Lökbatan palçıq vulkanı püskürüb. Yerli vaxtla saat 04:04-də Lökbatan palçıq vulkanının növbəti püskürməsini qeydə alıb.

Püskürmə ayrı-ayrı vaxtlarda 3 fazada qeydə alınıb. Birinci faza yerli vaxtla 04:04-də, ikinci faza saat 05:20-də, üçüncü faza saat 05:31-də qeydə alınıb. Püskürmənin davamlılığı 3 dəqiqə, dərinliyi 4 km qeydə alınıb.

“EDnews”-a açıqlamasında AMEA-nın "Palçıq vulkanizmi" şöbəsinin aparıcı elmi işçisi, yer elmləri üzrə fəlsəfə doktoru Orxan Abbasov bildirib ki, il ərzində Azərbaycanda 5-10 arasında palçıq vulkanı püskürməsi müşahidə olunur: “Bu geoloji hadisədir, davamlı olaraq qeydə alınır. Yaşayış məskənlərinə yaxın ərazidəki vulkanlarla bağlı təhlükə gözlənilə bilər. Digər vulkanlarla bağlı təhlükə gözlənilmir”.

Orxan Abbasovun sözlərinə görə, Azərbaycan ərazisində 353 palçıq vulkanı var ki, təqribən 200-ü quruda yerləşir: "Quruda olan vulkanların isə hamısı aktivdir demək düzgün olmaz. Amma onların çoxu aktivdir, püskürmələr müşahidə olunur".

Vulkan püskürməsinin zəlzələyə səbəb ola biləcəyi də müzakirə olunan məsələlərdəndir.

Geologiya və Geofizika İnstitutunun şöbə müdiri Qulam Babayev bildirib ki, zəlzələ ilə vulkan püskürmələri arasındakı əlaqə müzakirə mövzusudur:

“Bu günə qədər tədqiqatlar, çap olunmuş məqalələr olsa da, mübahisə davam edir. Vulkanmı zəlzələnin püskürməsinə səbəb olur, yoxsa zəlzələnin baş verməsi nəticəsində palçıq vulkanı aktivləşir, nu günə qədər dəqiq bir əlaqə yoxdur, sadəcə olaraq müxtəlif yanaşmalar mövcuddur”.