Hazırda Avropada qaz qiymətləri Norveçdəki dayandırmalar və külək enerjisi istehsalının azalması səbəbindən xeyli dərəcədə bahalaşır. Demək olar ki, bütün Qərb nümayəndələrinin Azərbaycan rəsmiləri ilə görüşləri zamanı enerji sahəsi vurğulanır. Hətta bunu NATO-nun baş katibidə görüşdə söyləyib. Azərbaycanın Avropada enerji siyasəti necədir?  Azərbaycan həqiqətəndə enerji sahəsində çətin vəziyyət olan Avropa üçün açardır?

Məsələ ilə bağlı iqtisadçı Natiq Cəfərli Ednews-a açıqlaması zamanı qeyd edib ki, Azərbaycan Avropanın enerji təchizatında kifayət qədər önəmli rol oynayan ölkədir”. 

“Təbii ki, Azərbaycan enerji sahəsində nəinki, Avropada bir çox digər regionlarda xüsusi əməkdaş statusundadır. Son dönəmlərdə Avropanın əsas enerji ixracatçısı olan Rusiya ilə gərgin münasibətlər Azərbaycanı bu sahədə ilk sıralara yüksəldib. Amma bu o demək deyil ki, Avropa tamamilə Azərbaycandan asılıdır.

Çünki Avropanın enerji ehtiyacı kifayət qədər çoxdur. İllik qaz istehlakı 500 milyard kubmetr qazdır. Azərbaycan isə Avropaya hələ ki, 10,5 – 11 milyard kubmetr qaz verir. Lakin 2027-ci ildən sonra isə bu rəqəmlərin ikiqatına, yəni, 20 milyard kubmetr olacağı proqnozlaşdırılıb. Onsuzda Azərbaycan ümumi istehlakın bir hissəsini təmin edib.

Sadəcə Azərbaycanın əhəmiyyəti ondan ibarətdir ki, Azərbaycanın  enerji təchiz elədiyi ölkələr Avropanın Cənub və Şərq ölkələridir. Bu ölkələrin daha çox Rusiyadan enerji asılıqları var idi. Hazırda isə bu ölkələr Rusiyadan enerji almadıqları üçün Azərbaycanın ixrac etdiyi qaz onlar üçün böyük önəm kəsb edir. Bu nöqteyi nəzərdən Azərbaycan Avropanın ən sərfəli və öz öhdəliklərini yerinə yetirən tərəfdaşlarından biridir və Avropa maraqlıdır ki, başda enerji sektoru olmaqla müxtəlif sahələrdə əməkdaşlığı genişləndirsin”.  

Xəyal Ramiz