Ermənistanın “Respublika” partiyasının sədri Aram Sarkisyan, Ermənistan mətbuatına müsahibəsində bəyan edib ki, “Ermənistan hakimiyyətinin atmalı olduğu ilk addım KTMT-dən çıxmaqdır. İkinci addım Ermənistanın MDB adlı mənasız strukturu tərk etməsidir. Bundan sonra Rusiya özü deyəcək ki, sərhəd qoşunlarını Ermənistandan çıxarır. Söhbət Türkiyə və İranla sərhəddə dayanan sərhədçilərdən gedir". Bundan savayı baş nazir Paşinyan da France 24-ə müsahibəsində Ermənistan KTMT-dəki iştirakını artıq dondurub deyə fikir səsləndirib.

Bəs bunu praktikada etmək deyildiyi kimi asandırmı? Bunun tətbiqində hansısa alətlər ola bilərmi?

Ednews – a açıqlamasında Cənubi Qafqaz regionu üzrə siyasi ekspert Arnold Stepanyan, bunun deyildiyi qədər asan olmadığını söyləyib:

“Rusiyanın Ermənistan üzərində ciddi iqtisadi rıçaqları var. Hərbi bazanın mövcudluğu, eləcə də xarici təhlükəsizlik təhdidləri bu rıçaqları gücləndirir. Ermənistan artıq sanki bir ülgüc üzərində yeriyir, bir neçə il bundan əvvəl belə ağlına gəlməyən şeyləri etməyə imkan verir. Əsl müstəqilliyə aparan yol tikanlıdır, qiyməti bahadır və bunu siyasi elita anlayır. Qətiyyətlilik, yanaşmalarda ehtiyatlılıq, həyati əhəmiyyət kəsb edən sahələrdə çoxvektorlu yanaşmaların gücləndirilməsi, hazırda Ermənistana yeganə lazım olan şeydir. Ona görə də düşünürəm bu cür açıqlamaları səsləndirdikdə olduqca ehtiyatlı olmaq lazımdır, çünki Rusiyanın cavabı ağır ola bilər”.

Rus politoloq və tarix elmlər doktoru Anton Bridixin Aram Sarkisyanı dəli adlandıraraq, bu açıqlamanın siyasi böhrana səbəb ola biləcəyini deyib:

“Məncə, Aram Sarkisyan Ermənistan dövlətçiliyinin ölümünü istəyən bir dəlidir. Bu cür bəyanatlarla o, nəinki informasiya ajiotajı yarada, əksinə, vəziyyəti siyasi böhrana apara bilər. Axı belə bəyanatın ardınca, məsələn, partiyanın təşkil etdiyi mitinqlər, xalq etirazları da ola bilər. Buna uyğun olaraq, Ermənistanda vaxtilə baş verən 2018-ci il mitinqləri təkrarlana bilər, lakin daha radikal qərəzli şəkildə. Ona görə də təbii ki, nəinki təhlükəsizliyin, regionun iqtisadi inkişafının, ümumilikdə Cənubi Qafqazın gələcəyinin təmin edilməsi baxımından belə bəyanatlar, təbii ki, son dərəcə destruktiv xarakter daşıyır. Erməni olmasam da, şəxsi düşüncəm odur ki, Aram Sarkisyan kimi adamlar, Ermənistan parlamentində ümumiyyətlə olmamalıdır”. 

Əkbər Novruz