Azərbaycanda daha az müddətdə hərbi xidmət keçirilməsi üçün alternativ modelin yaradılmasını təklif edilir. Bu addımın gənclərin təhsilinə əlavə təkan olacağı bildirilir. Bununla da tam müddət hərbi xidməti saxlamaqla, aşağı müddətli qradasiyalar müəyyən oluna bilər. 

Bəs Azərbaycanda indiki hərbi-siyasi şəraitdə, təklif edilən sistemə keçmək nə dərəcədə realdır? Ödənişli hərbi xidmətə keçid yaxın gələcəkdə mümkün görünürmü?

Ednews – a açıqlamasında Heydər Mirzə bu təklifi olduqca yüksək qiymətləndirib:

“Bu bir dünya praktikasıdır və qabaqcıl praktikadır. Lakin bu sistemin tam və işlək şəkildə layihə forması alması üçün daha detallı, bir neçə dövlət qurumunun iştirakı ilə işlər aparılmalıdır. Bu bir tək müdafiə və səfərbərlik məsələsi deyil, eyni zamanda sosial-iqtisadi məsələdir. Ola bilsin ki tədricən, mərhələlərlə həyata keçirilsin. Yəni istiqamət düzgündür. Düşünürəm ki, ya tez ya gec biz də bu sistemi bu və ya digər şəkildə qəbul edəcəyik”.

 
Həmsöhbətimiz təklifi dəstəklədiyini bildirsə də, eyni zamanda regionun təhlükəsizlik kontekstində sabit olmadığını da qeyd edib:

“Lakin məsələ bundadır ki, və bu da cənab Prezidentin andiçmə mərasimi zamanı səsləndirmiş olduğu sistemli mesajlardan da görünür, hazırda, baxmayaraq ki ölkəmizin ərazi bütövlüyü tam şəkildə bərpa olunub, regiondakı geosiyasi vəziyyət və təhlükəsizlik konteksti heç də sabit deyil. Təhlükələr var. Ordu və cəmiyyət bu təhlükələrə hər zaman hazır olmalıdır. Düşünürəm ki, bu amil qeyd olunan islahat təklifinin müzakirələri zamanı nəzərə alınmalıdır”.

Əkbər Novruz