Ermənistanın hakim “Mülki Müqavilə” partiyasının parlament fraksiyasının katibi Artur Ovannisyan Milli Assambleyada keçirilən həftəlik brifinqdə bildirib ki, Ermənistan Avropa İttifaqının vasitəçiliyi ilə Azərbaycanla danışıqların bərpasına sadiqdir. Xatırladaq ki, bundan əvvəl Şarl Mişel də seçkilərdən sonra İlham Əliyev ilə son telefon zəngində eyni məsələni müzakirə edib. 

Bəs Brüssel bu dəfə sülh üçün ortaq məkan ola bilərmi? Yoxsa bu da daha bir “blef” -dir?

Ednews – a açıqlamasında politoloq İlqar Vəlizadə hesab edir ki, hazırda Avropa İttifaqında qarşıdan gələn parlament seçkilərinə görə bu məsələ hələlik mümkün görülmür:

“Düşünürəm bu sadəcə təklifdir, gedişatdır. Brüssel hazırda olduqca məşğuldur. Bildiyiniz kimi Avropa İttifaqında parlament seçkiləri ilə bağlı hazırlıqlar gedir. Ona görə düşünürəm hazırda bununla bağlı yaxın zamanda hansısa bir irəliləyiş olsun. Həmçinin onu da əlavə etmək istəyirəm ki, Brüsseldə keçirilməsi söylənilən görüş ilə bağlı heç bir təklif də gəlməyib. Eyni zamanda İttifaqın aparıcı şəxslərindən biri olan Cosep Borell, Azərbaycana qarşı çox təzadlı, ziddiyyətli və qərəzli fikirləri ilə bir sıra çıxışlar edir. Ona görə də düşünürəm belə bir vəziyyətdə Avropa meydanı bizim üçün nə dərəcədə prioritet rolunu oynaya bilər? 

Şarl Mişel aydındır ki, İlham Əliyev ilə telefon zəngində bu təklifi irəli sürüb lakin, bu diplomatik protokol üzərindədir. Hərçənd Aİ buna maraq göstərdiyini nümayiş etdirir, lakin konkret olaraq əməldə bu görsənmir".

Həmsöhbətimiz, seçkilərin yekunlaşmasından sonra Azərbaycanın nəzər yetirməli olduğu məsələlərə də toxunub:

“Seçkilər yekunlaşdıqdan sonra biz əsasən hansı siyasi qüvvələrin üstünlük qazanmasına nəzər yetirməliyik. Bu da özü ilə birlikdə əlavə bir sıra məsələni ön plana çıxarır. Yeni sədr, yeni rəhbərlik bununla bağlı hansı mövqeni tutacaq?, hansı mesajlar veriləcək?, Fransanın aslılığında qalacaqlarmı? və.s. Bu cür bir sıra şərtlər və suallar var ki, hansı ki, hər birini nəzərdə saxlamaq lazımdır”.

Əkbər Novruz