AŞPA dünən baş tutan qış sessiyasının ilk iclasında Azərbaycan nümayəndə heyətinin etimadnaməsi təsdiqlənməyib. Almaniyalı deputat Frank Şvabenin bununla bağlı təklifi dəstəkləyib. Azərbaycan nümayəndə heyəti iclasda iştirak etsə də, onların səsvermə hüququ məhdudlaşdırılıb.
Milli Məclis deputatı Fazil Mustafa Ednews – a açıqlamasında baş tutan prosesin Azərbaycan üçün heç bir mənfi nəticə gətirməyəcəyini söyləyib:
“AŞPA-da keçirililən sessiyaya qatıla bilməməyimiz səbəbi prezident seçkiləri ilə bağlıdır. Çünki Prezident seçkilərində namizəd olaraq iştirak edirik. Bu da öz növbəsində düşünürəm hər hansısa bir mənfi diplomatik nəticə doğura bilməz. Bizim bunu növbəti sessiyalarda da etmək imkanımız var. Eyni zamanda orada baş verən prosesləri biz yaxından izləyirik. Hər hansı bir şəkildə qeyri – obyektiv bir yanaşmalar olduqda, uyğun olaraq reaksiyamızı bildiririk. Sadəcə qeyd etdiyim kimi hazır ki, seçki dönəminə görə hazırda bu məsələdə heç bir siyasi nəticə ortaya qoymaq doğru deyil. Hərçənd Azərbaycanın iştirakı olmadan hansısa bir qərar qəbul olunarsa, qərarın mahiyyətinə uyğun reaksiyamız müsbət və ya mənfi olaraq ortaya qoyulacaq”.
Amerikalı politoloq və hüquqşünas İrina Zukerman öz şərhində alınan qərarın olduqca təzadlı olduğunu vurğulayıb:
“Baş tutan bütün proseslər kinayəli xarakteristika daşıyır, çünki alman nümayəndə heyətinin etimadnaməsinə Böyük Britaniyadan olan həmkarı Almaniyadakı siyasi tarazlığı əks etdirmədiyi üçün etiraz edib. Şəffaflıq naminə, xüsusilə bu müşahidəçilərin Ermənistanda olmasının birtərəfli xarakteri ilə bağlı iddiaların kontekstini nəzərə almaq lazımdır. Bu müşahidəçilərin təhlükəsizliyi ilə bağlı qanuni narahatlıq yaranarsa, Azərbaycanın Aİ müşahidəçilərinə icazə verməsi optimal olardı, bütün bu məlumatlar ictimaiyyətə açıqlanmalıdır. Eləcə də “siyasi məhbuslar”la görüşlərin qarşısının alınması ilə bağlı iddialardan kimin nəzərdə tutulduğu və bu müraciətlərin əsaslı şəkildə edilib-edilmədiyi və ya niyə rədd edildiyi aydın deyil. Əgər onlar bu cür görüşlərin Azərbaycan əleyhinə təbliğat üçün istifadə oluna biləcəyindən narahatdırlarsa, bu, həmin narahatlıqları dilə gətirmək, gələcəkdə siyasi hücumlardan, bu cür görüşlərdən sui-istifadədən qaçmaq üçün təminatları müzakirə etmək və xoş bir çərçivə yaratmaq üçün yaxşı vaxtdır. Belə olduğu halda zənnimcə bu tərəflərin narahatlığını həll edəcək”.
Politoloq həmçinin Azərbaycana məhdudiyyət qoyulması ehtimalını da şərh edib:
Hərçənd bu vəziyyət həll olunmazsa və yaxın gələcəkdə Azərbaycanın tam iştirakına məhdudiyyət qoyularsa, öz maraqlarına təsir edən müvafiq məsələlərdə söz sahibi olmaq imkanını ədalətsiz şəkildə məhdudlaşdırılmış olacaq. Bu da nəticə etibarı ilə bütün Avropanı narahat edən məsələlərə fərqli baxış bucağı yaradacaq və bu məsələlərin həllini düşmən və ya rəqib maraqların xeyrinə işləmiş olacaq. Üzvlərin qəsdən xaric edilməsi və ya məhdudlaşdırılması, ehtimal ki, gərginlik yarada bilər, Avropa işlərinə sabitliyi poza bilər və komitə daxilindəki perspektivlərin müxtəlifliyinə xələl gətirərək, bütün üzvlərin müxtəlif maraqlarına zəif xidmət göstərəcək qrup düşüncəsi yarada bilər. Bu cür iddiaların müəyyən edilməsi üçün aydın proseduranın olmaması faktı qanuni və diplomatik paritet anlayışına xələl gətirən prosessual və mahiyyət etibarı ilə qarışıqlıq yaradır”.
Əkbər Novruz
