Avropa İttifaqının Müşahidə missiyasının 2025-ci ilə qədər Ermənistanda qalması və sərhəddə müşahidələr aparması üçün 39 milyon avro vəsait ayrılması nəzərdə tutulub.

Bu da Avropa İttifaqının  Ermənistana "xüsusi dəstəyinin” yenə də davam edəcəyi deməkdir. Hətta bəzi məlumatlara görə Aİ Ermənistana qarşı üzvlük verməsi haqqında planlar da qurur.  

Ermənistanın gələcəkdə Aİ-ə üzv olma ehtimalları nə qədərdir?

Məsələ ilə bağlı politoloq Tural İsmayılov Ednews-a açıqlamasında bildirib ki, yaxın gələcəkdə Aİ-nin Ermənistana üzvlük verməsi qeyri-realdır:

“Avropa İttifaqının içində ayrı -ayrı maraq dairələri və mənafeləri olan tərəflərin sayı çoxdur. Həmçinin Aİ üzvlük məsələsinə qarşı çox eqoistdir. Biz Gürcüstan və Ukrayna timsalında da gördük ki, Aİ-nin özündən  görmədiyi dövlətləri və cəmiyyətləri bura üzv etmək kimi maraqları yoxdur.

Bu maraqlar  olsa belə Ermənistan heç bir standarta görə Avropa ittifaqına üzv ola bilməz. Faktiki olan odur ki, Ermənistan hələ də Rusiyanın alt postudur, Ermənistanda hələ də Rusiyanın hərbi bazaları və sərhədlərində Rusiya əsgərləri var. Nəticə olaraq da belə bir ölkənin Avropa İttifaqına üzv kimi qəbul edilməsi mümkün deyil”.
Politoloq vurğulayır ki, bu gün Avropa İttifaqının mülki  müşahidə adı altında Ermənistana göndərdiyi  müşahidəçilərin əslində hədəfləri və məqsədləri fərqlidir:

 
“Birincisi Aİ struktural  və qurum olaraq Ermənistana göndərilən missiya ilə bağlı  ortaq rəy verməyib. Yəni bütün Aİ üzvlərinin birgə və ortaq rəyi mövcud deyil.

Göndərilən müşahidəçilərə nəzər yetirdikdə görürük ki, Fransanın  təhrikləri və təzyiqləri ilə təşkil olunub. Digər tərəfdən bu mülki misiya adı altında gələn qrup  Ermənistana gələrkən konkret bir müddət ərzində iki ölkə arasında sərhəddə baş verə biləcək hər hansı problemin qarşısını almağı nəzərdə tutmuşdu.

Amma biz görürük ki,  bütün bu müddət ərzində  məqsədə uyğun heç bir addım atılmadı və əksinə  o mülki müşahidə missiyası Ermənistan ərazisində konkret olaraq İran-Rusiya əleyhinə casus fəalliyəti ilə məşğul olur.

Əgər hazırda Azərbaycan  və Ermənistan sülhdən danışırsa, şərti sərhədlərdə vəziyyət stabildirsə hər bir aydan bir müşahidəçilərin sayını artırmaq hansı məntiqə uyğundur? Eyni zamanda Ermənistan bu müşahidəçilərin mandatlığını və səlahiyyətlərini artırmağa çalışır. Hətta Ermənistanın bir çox şəhərlərində onlara nümayəndəlik ofisləri açılır.

Bu missiyanın fəaliyyətinin nə olduğu aydın deyilsə, onlara necə ofislər açılır? Bununla da Ermənsitanın region ölkələrinə qarşı Qərb əli ilə zəmin yaradılır”. 

Xəyal Ramiz