Mərakeş kralı VI Məhəmməd iqlim dəyişikliyindən qaynaqlanan quraqlıq və iqtisadi səbəblərə görə bu il ölkədə qurban kəsilməməsinə çağırış edib və bu ibadəti Mərakeş xalqı adından özünün icra edəcəyini bəyan edib.

“EDnews” xəbər verir ki, Kral VI Məhəmmədin bununla bağlı müraciət Mərakeşin dini işlər və fondlar naziri Əhməd əl-Tevfik tərəfindən dövlət televiziyasında səsləndirilib.

Müraciətin mətnində ölkənin ekoloji və iqtisadi çətinliklərlə üzləşdiyi , buna görə də  heyvanların sayında əhəmiyyətli dərəcədə azalmanın yarandığı vurğulanıb.

Həmçinin qurban kəsməyin mümkün olduqca yerinə yetirilməsinin vacib olduğu, lakin mövcud çətinliklər qarşısında, xüsusilə cəmiyyətin aztəminatlı təbəqələri üçün böyük yük ola biləcəyi vurğulanıb.

 Ölkə rəhbərliyi üzərinə düşən məsuliyyət və dini vəzifələrin asanlaşdırılması öhdəliyinə uyğun olaraq, xalqa bu il qurban kəsməkdən çəkinmələri ilə bağlı çağırış edib.

Müraciətdə  Qurban bayramının hərzamankı kimi, ənənəvi olaraq qeyd olunacağı da nəzərə çatdırılıb.

Qeyd edək ki, Mərakeşdə daha əvvəl də üç dəfə qurban kəsmə ibadətindən imtina edilib. 1963, 1981 və 1996-cı illərdə insanlardan qurban kəsməkdən çəkinmələri xahiş olunub.

Fatimə Mərdanlı//EDnews