Şimali Sentinel Adası dünyanın ən sirli və əlçatmaz yerlərindən biridir. 1956-cı ildən etibarən Hindistan hökuməti adaya girişə qadağa qoyub və bu qadağa həm adada yaşayan yerliləri, həm də kənar şəxsləri qorumaq məqsədi daşıyır.
Qadağanı pozan amerikalı misyoner necə öldürüldü?
"EDnyus" xəbər verir ki, 26 yaşlı amerikalı misyoner Con Allen Çau 16 noyabr 2018-ci ildə kano ilə adaya daxil olduqdan qısa müddət sonra yerlilər tərəfindən öldürülüb.
O, əvvəllər iki dəfə adaya yaxınlaşmağa cəhd edib, lakin yerlilər tərəfindən qovulub. İlk cəhdində adanın yaxınlığında ingiliscə danışaraq onlarla ünsiyyət qurmağa çalışıb, ancaq yerlilər onu uzaqlaşdırıb. İkinci dəfə isə bir Sentinel uşağı tərəfindən oxla vurulub.
Bütün bunlara baxmayaraq, üçüncü dəfə adaya girməyə qərar verib. Hindistan qanunlarına zidd olaraq 285 dollar qarşılığında balıqçılar onu adaya aparmağa razı olub. Lakin bu cəhd onun həyatına son qoyub.
Adanın qadağan olunmasının səbəbləri
Şimali Sentinel Adası və orada yaşayan qəbilə min illərdir tamamilə izolyasiya olunmuş vəziyyətdə yaşayır. Onlar xarici dünyaya qarşı aqressiv davranışları ilə tanınır və hər cür əlaqəni rədd edirlər.
Hindistan hökumətinin 1956-cı ildə qəbul etdiyi qanun yalnız yadplanetlilər kimi görünən bu qəbiləni deyil, həm də onları ziyarət etmək istəyənləri qorumaq məqsədi daşıyır.
Bu qadağanın üç əsas səbəbi var:
Xəstəliklərə qarşı həssaslıq - Sentinel xalqının min illərdir xarici dünya ilə heç bir təması olmadığı üçün immun sistemləri müasir xəstəliklərə qarşı tamamilə müdafiəsizdir. Adi bir qrip belə, onların məhvinə səbəb ola bilər.
Mədəni və həyat tərzinin qorunması - Qəbilə öz ənənələrini, dilini və həyat tərzini qoruyaraq bəşəriyyətin ən qədim icmalarından biri kimi qalmaq istəyir. Xarici təsirlər onların mədəniyyətini və identikliyini yox edə bilər.
İstismar və müdaxilənin qarşısını almaq - Tarixdə izolyasiya olunmuş qəbilələrlə təmas faciəvi nəticələr doğurub. Məsələn, 1980-ci illərdə Perunun Amazon meşələrində Nahua qəbiləsinin yarısından çoxu xarici şəxslərdən yoluxan xəstəliklər səbəbilə ölüb.
Sentinel xalqı haqqında nə bilirik?
Adanın ölçüsü - Təxminən 60 kv.km olan ada Benqal körfəzində, Andaman və Nikobar adalarının bir hissəsi kimi yerləşir. Meşələrlə örtülmüş, sahilləri isə ağ qum və mərcan rifləri ilə əhatəlidir.
Həyat tərzləri - Adada yol, gəmi və ya hava limanı yoxdur. Sentinel xalqı ovçuluq və yığıcılıqla dolanır. Dəmir alətlərdən istifadə etdikləri, lakin bunları xarici gəmilərdən əldə etdikləri düşünülür.
Dilləri və mədəniyyəti - Onların dili heç bir məlum dil ailəsinə aid edilmir. Mədəniyyətləri və adətləri isə tamamilə sirr olaraq qalır.
Agressiv davranışları - Onlar hər cür yad insanlara düşmən münasibət bəsləyir və adalarına yaxınlaşan hər kəsi ox və nizələrlə qovurlar.
Sentinel xalqı ilə ilk əlaqə
Sentinel xalqını öyrənmək üçün Hint antropoloqu Triloknat Pandit 1967-ci ildə ilk dəfə adaya yaxınlaşıb. Onun məqsədi qəbilə ilə ünsiyyət qurmaq olub. O və komandası illərlə adanın sahillərinə kakos, banan və metal alətlər qoyaraq yerlilərlə dostluq yaratmağa çalışıb.
4 yanvar 1991-ci ildə gözlənilməz bir hadisə baş verib: ilk dəfə Sentinel yerliləri silahsız şəkildə sudan çıxaraq qonaqları qəbul edib və kakosları özləri götürüblər. Lakin bu an qısa sürüb.
Pandit onlardan bir az aralandıqda gənc bir Sentinel oğlan ona bıçağını göstərərək başını kəsəcəyini işarə edib. Pandit dərhal adanı tərk edib.
Bu qısa təmasdan sonra Sentinel xalqı yenidən təcrid olunmağı seçib və 1990-cı illərdən etibarən bütün yad insanlara qarşı düşmən münasibətini davam etdirib.
Hindistan hökumətinin mövqeyi
2010-cu ildə qanunlar daha da sərtləşdirilib və Sentinel xalqını qorumaq üçün adaya giriş qəti şəkildə qadağan edib.
Hökumət Sentinel xalqını müasir dünyaya inteqrasiya etdirmək fikrindən tamamilə imtina edib və onları olduğu kimi yaşamağa buraxıb.
"Onlar bizi istəmirsə, biz də onları narahat etməməliyik", deyə Hindistan Antropologiya Araşdırmaları İnstitutunun verdiyi rəsmi açıqlamalardan birində qeyd edilir.
Getmək olmaz, çünki onlar bizi istəmirlər!
- Şimali Sentinel Adası müasir dünyanın əl dəyməmiş son insan icmalarından biridir.
- Oraya yaxınlaşmaq həm adadakılar, həm də kənar şəxslər üçün ölümcül nəticələr doğura bilər.
- Onlar öz həyatlarını qorumaq üçün hər cür xarici müdaxiləyə qarşı çıxırlar və görünən odur ki, Hindistan hökuməti də onların bu istəyinə hörmət edir.
Əgər siz də dünyanın ən sirli yerlərini araşdırmağı düşünürsünüzsə, Şimali Sentinel Adası bu siyahıda olmamalıdır!
