Füzuli rayonunda son illər görülən meliorativ tədbirlər nəticəsində əkin sahələrinin vaxtında suvarma suyu ilə təmin edilməsi məhsul bolluğuna səbəb olub.
“EDnews” xəbər verir ki , işlər Füzuli Su Meliorasiya Sistemlərinin İstismarı İdarəsi tərəfindən həyata keçirilib.
Qeyd olunub ki, cari ildə rayon ərazisində faktiki olaraq 9110 hektar payızlıq taxıl bitkisi əkilib, 9110 hektar əkin sahəsi 1-ci suvarma suyu ilə, 2-ci suvarma suyundan isə 4600 hektar əkin sahəsi suvarma suyu ilə təmin edilib və 4510 hektarında isə hazırda suvarma işləri davam etdirilir. Su itkisinin qarşısını almaq üçün suvarma kanallarında 39 min kubmetrə yaxın, torpaqların münbitliyinin artırılması üçün isə kollektor şəbəkəsində 17,4 min kubmetrlikdən təmizləmə işləri görülüb. Həmçinin Quruçay selliyinin Böyük Bəhmənli kəndi ərazisində 4 kilometrlik hissəsində çay məcrasının tənzimlənməsi işlərinə başlanılıb. İlin əvvəlindən 6 ədəd hidrotexniki qurğu və qapalı boru kəmərində cari təmir işləri aparılıb, həmçinin 19 ədəd nasos stansiyada və 15 ədəd subartezian quyusunda təmir işləri aparılaraq hər biri saz vəziyyətə gətirilib. Həmçinin idarənin balansında olan subartezian quyularından 6 ədədinin əsaslı təmir olunması planlaşdırılır.
Füzuli Su Meliorasiya Sistemlərinin İstismarı İdarəsinin balansında nasos stansiyalardan və subartezian quyularından 16 ədəd nasos stansiya və 50 ədəd subartezian quyusu əhalinin içməli suya olan tələbatını ödəyir. İdarə tərəfindən 18 kəndin, 12 məcburi köçkün qəsəbəsinin və Füzuli şəhərinin içməli su təminatı həyata keçirilir. İdarə tərəfindən 24 saat içməli su ilə təchiz olunan Füzuli şəhəri ilə yanaşı, Horadiz şəhəri, Əhmədalılar, Molla-Məhərrəmli, Böyük Bəhmənli kəndləri və məcburi köçkünlərin müvəqqəti olaraq məskunlaşıb yaşadığı 2 Fin qəsəbəsi də içməli su ilə təmin olunur.
Qeyd edək ki, rayon ərazisində 12 ədəd su təmizləyici qurğu fəaliyyət göstərir. Magistral içməli su şəbəkəsinin uzunluğu 345 kilometr, məhəllədaxili şəbəkənin uzunluğu 346 kilometr olmaqla ümumilikdə 691 kilometr təşkil edir. İdarənin balansında fəaliyyət göstərən 29 ədəd su anbarı mövcuddur və vətəndaşların içməli su tələbatının ödənilməsi üçün hər bir su anbarı istismar tədbirlər planına uyğun olaraq təmizlənir və mühafizə olunur.
Fatimə Mərdanlı // EDnews
