Cenevrədə keçirilən milli minatəmizləmə agentliklərinin rəhbərləri və BMT müşavirlərinin 28-ci Beynəlxalq iclası beynəlxalq ictimaiyyətin humanitar minatəmizləmə sahəsində birgə fəaliyyətini və əməkdaşlığını dərinləşdirmək məqsədi daşıyır. Bu nüfuzlu tədbirdə Azərbaycanın fəal iştirakı, xüsusilə də ANAMA-nın rəhbərlik etdiyi nümayəndə heyətinin çıxış və təşəbbüsləri ölkəmizin bu sahədəki qlobal rolunu və artan nüfuzunu bir daha nümayiş etdirib.
Azərbaycan nümayəndə heyətinə ANAMA İdarə Heyətinin sədr müavini Samir Poladovun rəhbərlik etməsi ölkənin minatəmizləmə fəaliyyətinə verdiyi yüksək əhəmiyyətin göstəricisidir. O, plenar sessiyada çıxışında qeyd edib ki, minalar və digər partlayıcı qalıqlar dünyanın müxtəlif bölgələrində insanların həyatını təhdid edən əsas humanitar problemlərdən biridir. Xüsusilə də Azərbaycanın işğaldan azad olunmuş ərazilərində mina problemi uzunmüddətli təhlükə yaratmaqla yanaşı, əhalinin təhlükəsiz şəkildə öz yurdlarına qayıdışını əngəlləyir.
Tədbir çərçivəsində baş tutan “Milli Potensialın İnkişafı: Minalarla Mübarizədə Effektiv Lokallaşdırma” mövzusunda plenar sessiyada Azərbaycan nümayəndəsinin panelist kimi iştirakı və təqdim etdiyi yanaşmalar ölkəmizin bu sahədə əldə etdiyi təcrübə və innovativ modellərin beynəlxalq platformada paylaşılmasına imkan verib.
Bundan əlavə, ANAMA tərəfindən təşkil olunan “Humanitar minatəmizləmə fəaliyyətində tədqiqat, innovasiya və texnologiyanın inkişafı” adlı yan tədbir də xüsusi maraq doğurub. Burada ASEAN Regional Minatəmizləmə Mərkəzinin icraçı direktoru, Cenevrə Beynəlxalq Humanitar Minatəmizləmə Mərkəzinin və BMT-nin mütəxəssisləri ilə birgə keçirilən panel müzakirələrdə minatəmizləmə əməliyyatlarında texnoloji yeniliklərin tətbiqi, süni intellekt, pilotsuz uçuş aparatları, yerin 3D xəritələnməsi kimi müasir texnologiyaların effektiv istifadəsi müzakirə olunub.
Panel müzakirələri zamanı həmçinin əməliyyatların planlaşdırılmasında və prioritetlərin müəyyənləşdirilməsində yeni metodologiyaların tətbiqi, resursların daha səmərəli istifadəsi və beynəlxalq təcrübə mübadiləsinin əhəmiyyəti vurğulanıb.
Bu cür beynəlxalq tədbirlər Azərbaycanın humanitar minatəmizləmə sahəsindəki səylərinin beynəlxalq ictimaiyyət tərəfindən tanındığını və dəstəkləndiyini göstərir. ANAMA-nın təşəbbüsləri, texnologiyaya əsaslanan yanaşmaları və regional əməkdaşlıqlara açıq mövqeyi, ölkəmizin bu sahədə lider mövqe tutmaq istiqamətində ciddi addımlar atdığını nümayiş etdirir.
Mədinə Məmmədova\\EDnews
