Gürcüstan hər zaman Azərbaycanın dəstəyini hiss edib və bu dəstəyi xüsusilə ölkənin ərazi bütövlüyü və suverenliyinin qorunmasında daha aydın şəkildə görüb.

“EDnyus” xəbər verir ki, bu fikirləri ölkə parlamentinin sədri Şalva Papuaşvili Tbilisidə səfərdə olan Azərbaycan parlamentinin nümayəndə heyəti ilə görüşdə səsləndirib.

“Bəzi dövlətlər Gürcüstana dəstək ifadə etsələr də, Azərbaycan bu dəstəyi sözdə yox, əməldə göstərib. Buna görə Azərbaycan Prezidentinə, parlamentinə və dost Azərbaycan xalqına minnətdarlığımızı bildiririk”, - deyə Ş.Papuaşvili vurğulayıb.

O qeyd edib ki, bu gün Azərbaycan və Gürcüstan arasında əlaqələr strateji tərəfdaşlıq səviyyəsinə yüksəlib və bu da bütün sahələrdə, o cümlədən parlamentlərarası münasibətlərin inkişafı üçün geniş imkanlar yaradır:

“Ümid edirəm ki, Azərbaycan parlament nümayəndə heyətinin bu səfəri əlaqələrimizin daha da möhkəmlənməsinə töhfə verəcək”.

Gürcüstan parlamentinin sədri Azərbaycan Milli Məclisinin sədri Sahibə Qafarovanı Gürcüstana səfərə dəvət edib və bildirib ki, Gürcüstan tərəfi bu səfəri səbirsizliklə gözləyir.

Azərbaycan Milli Məclisinin Müdafiə, Təhlükəsizlik və Korrupsiya ilə Mübarizə Komitəsinin sədri, nümayəndə heyətinin və Azərbaycan-Gürcüstan parlamentlərarası əlaqələr üzrə işçi qrupunun rəhbəri Arzu Nağıyev bildirib ki, bu görüş oktyabrın 26-da Gürcüstanda keçirilən parlament seçkilərindən sonra ilk görüşdür. O, tərəflər arasındakı əməkdaşlığın yeni tərkibdə də səmərəli olacağına ümidvar olduğunu qeyd edib:

“Bu gün Azərbaycan və Gürcüstan arasındakı dostluq münasibətləri bütün sahələrdə uğurla inkişaf edir və dünyada nümunə kimi göstərilir. Azərbaycan nümayəndə heyətinin bu səfərinin əsas məqsədi mövcud əlaqələrin daha da möhkəmləndirilməsi və genişləndirilməsinə töhfə verməkdir”.

Görüş zamanı tərəflər qarşılıqlı maraq doğuran digər məsələlər ətrafında da fikir mübadiləsi aparıblar.

Sonda qarşılıqlı xatirə hədiyyələri təqdim edilib.

Daha sonra Azərbaycan nümayəndə heyəti Gürcüstan parlamentinin komitə sədrləri və dostluq qrupunun üzvləri ilə görüş keçirib.