İqtisadiyyat Nazirliyi yanında İqtisadi Zonaların İnkişafı Agentliyinin idarəçiliyində olan sənaye zonalarında “yaşıl enerji”dən istifadə genişləndiriləcək.

Bu barədə “EDnews"-un sorğusuna cavab olaraq agentlikdən bildirilib.

Məlumata görə, sənaye zonalarına rezidentliyə qəbul zamanı qurulacaq müəssisənin müasir texnologiyalardan istifadə etməsi, ekoloji standartlara cavab verməsi və s. amillər əsas tələb kimi qoyulur.

Ötən il agentliklə Azərbaycanda alternativ enerji stansiyaları qurulması üzrə ixtisaslaşmış “AGAS Group” MMC arasında əməkdaşlığa dair Anlaşma Memorandumu imzalanıb. Həyata keçiriləcək layihə çərçivəsində Hacıqabul Sənaye Parkında obyektlərin alternartiv enerji ilə təmin edilməsi nəzərdə tutulur. “AGAS Group” Parkda 2,5 MVt-lıq Günəş Elektrik Stansiyasının (GES) qurulmasının texniki-iqtisadi əsaslandırmasını hazırlayacaq. Növbəti mərhələdə GES-in qurulması, Parkın “yaşıl enerji" ilə təmin olunması planlaşdırılır.

Bununla yanaşı, Ağdam Sənaye Parkı və "Araz Vadisi İqtisadi Zonası" Sənaye Parkında hazırda sosial zonanın işıqlandırılmasında günəş panellərindən istifadə olunur. Gələcəkdə parkda bu işıqlandırma növünün rezidentlərdə də təbiq edilməsi reallaşa bilər.

Çinin BYD şirkətinin Sumqayıt Kimya Sənaye Parkında elektrik mühərrikli avtobusların istehsalı layihəsinin də həyata keçirilməsində əsas məqsəd ölkədə ictimai nəqliyyatı yaşıllaşdırmaq, karbon emissiyasını azaltmaq və ətraf mühiti qorumaqdır. Bütün bu deyilənlərlə paralel olaraq ictimai nəqliyyat qarajı yenilənəcək.

Sənaye zonalarındakı müəssisələrdə müasir texnologiyalar və innovativ yanaşmalar tətbiq edilir. Bu da istehsal sahəsində bir çox müsbət amillərin ortaya çıxmasına imkan verir. Belə ki, sənaye zonalarında fəaliyyət göstərən rezidentlər ekoloji cəhətdən təmiz, ətraf mühit üçün tam zərərsiz istehsal zənciri formalaşdırır.